E tāui te orara’a ha’api’ira’a ‘o te mau tamari’i nō te tuatahi i teie ha’amatara’a ha’api’ira’a ‘i mua nei. 182 fare ha’api’ira’a ‘e 20 fare ha’api’ira’a fa’a’u’i mā’ohi e fa’anahonahohia te terera’a ha’api’ira’a i te hepetoma. Mai tāua tai’o mahana ra, e 24 hora ha’api’ira’a atu ra ia, eiaha fa’ahou ra 27 hora. Ia au i te mau nūmera a te Fa’aterehau, ‘o Makemo ana’e tei mā’iti nō te hepetoma ha’api’ira’a e 4 mahana, te rahira’a o te mau metua e te mau ‘orometua, ‘ua tāpe’a mai ia e pae mahana ha’api’ira’a ‘i te hepetoma e’ita e hau atu 6 hora i te mahana. 84.4% o te mau metua ‘e 96.6% o te mau ‘orometua tei mā’iti i roto ‘i te māna’ona’ora’a teie a’e te rāve’a e manuia ai te mau pīahi i tā rātou ha’api’ira’a.
« Fa’a’ite atu vau ia ‘outou, ‘i ni’a i te ‘āpapara’a, ia au i te hi’opo’ara’a i fa’atupuhia ‘i ‘Europa, pi’ihia PISA, tei ni’a te fenua ‘Auterāria i te 13ra’a o te ‘āpapara’a, ‘e 4 hora ‘e te ‘āfa ha’api’ira’a noa tā rātou i te mahana tāta’i tahi. Te fenua Farāni, tei ni’a ‘ōna i te 26ra’a o te ‘āpapara’a. Nā ‘outou ihoā e ‘ite mai ‘eaha te fa’aotira’a… » te pāhonora’a mātāmua teie a te fa’aterehau nō te ha’api’ira’a Ronny Teriipaia i te po’ipo’i mōnirē, i muri mai i tāna vauvaura’a mana’o.
Te vāhi māere rā, rahi te mau metua ‘e te mau ‘orometua tei tāpe’a i te fa’aaura’a 4. ‘Ohipa noa te tamari’i ‘i te po’ipo’i. ‘Aita ‘e tauturu i te pae o te hau fenua ‘e te mau ‘oire nō te ha’apa’o i te mau tamarii. « Mea ti’a ‘ia ha’amana’ohia i te mau metua, mea ti’a ia rātou ‘ia amo i tā rātou nei hōpoi’a. Nō te mea, mai te mau matahiti ‘i haerehia mai nei, ti’aturi noa te mau metua i ni’a i te mau ‘orometua. Te vai ra te tuha’a a te ‘orometua, te vai ato’a ra te tuha’a ‘a te metua. Terā ra, mea ti’a ‘ia fa’aho’ihia te ‘ohipa ‘i ni’a i tōna vaira’a » te fa’aterehau Ronny Teriipaia.
‘Ua tāpe’a ato’a mai te rahira’a o te mau ‘oire i te fa’aaura’a 2. ‘Aita te mau tau’ara’a parau i nia i teie mau tāuiuira’a i hope atu rā. Te toe rā ā te mau hora ha’amatara’a ‘e te mau hora fa’aotira’a ha’api’ira’a. Ha’amata anei i te hora 8 i te ‘āfa ‘aore rā i te hora 7 ‘e te ‘āfa… tei roto teie ‘ohipa i te tuatāpapara’a ‘e te fa’aterera’a hau nō te utara’a. Te tahi teie o te mau rāve’a nō te fa’aiti i te pere’o’o ‘i nia i te purūmu. « Tā mātou ‘ohipa ‘nō te mau hepetoma ‘i muri nei, te hi’ora’a ia te raura’a o te mau hora nā ni’a i te mau fare ha’api’ira’a ‘e nā ni’a i te mau ‘oire ‘e tō rātou hōpe’ara’a, ‘i ni’a i te terera’a pere’o’o. Ia au i tā mātou ferurira’a e fa’atae mātou i te fa’aterera’a hau nō te ha’api’ira’a i te mau hora tano, nō te fa’aiti mai te terera’a i ni’a i te porōmu » Jordy Chan fa’aterehau nō te mau patura’a rarahi, ti’a’au nei te utara’a.
I te ‘āva’e tiunu teie mau hora e ha’amanahia ai.
