Fātata 40% o te mau tio e faa’amuhia ra i Poutoru tei mate. Te mea ia e pe’ape’ahia ra e na ti’a e piti, o te pū o te fa’ahotu moana. A tahi ra teie faito a roa’ahia ai i roto hō’ē ârea e piti ‘āva’e. Te mea e maerehia ra, ‘aita e fifi a’e i tupu i roto nā matahiti e piti mātāmua.
« Faito terā i tāpa’ohia nō teie piti ‘āva’e i ma’iri a’e nei. Eiaha tātou e tapitapi nō te fa’anahora’a nō te paraura’a mea rahi terā i fa’aru’e, i roto i terā ārea e piti matahiti, ‘aita roa atu. ‘Ua ō ato’a tātou i roto i te ārea ua, pūva’iva’i ato’a i teie mau mahana. Te vai ra ihoa te tahi mau tio tei pohepohe, i roto ra i tōna fa’atupura’a e mea tupu maita’i ia », i te reo ‘o Romy Tavaeari’i, fa’atere o te piha rava’āi nō Raro mata’i.
E fifi tirotiro anei, aore ra te huru o te reva ? A tīa’i noa ai i te mau pū’ohura’a mai roto mai i te pū mā’imiraa, ‘ua fa’ata’ahia te mau tio maita’i. ‘Ua nūmerahia, faitohia hou a tu’uhia atu ai i roto i te mau ‘ete ‘āpī nō te pāruru i tō rātou tupura’a.
« Ua rau te mau ‘ete i fata’ahia, maoti teie rave’a, e roa’a ia mātou i te hi’opo’a maita’i te faito o te mau tio i pohe. ‘E aha te ‘āva’e i te tupuraa ? Hi’o atu ai e tū’ati anei ra i te huru o te reva. Te vai ato’a ra te tahi mau ‘ete i fa’ata’ahia nō te mau hi’opo’araa hope’a matahiti. Te reira, nō te faito i te manuiara’a o teie ‘ōpuara’a », i te reo ‘o Camille Grosjean, ‘aivāna’a nō te pū fa’ahotu moana.
I te hi’ora’a o te tāvana tuha’a nō Poutoru, te tauiuira’a o te anuvera te fifi o teie ohipa. Toe ra i te ha’apāpū-roa-ra’a. Te ‘ohipa rū i teie taime, te imira’a ia e nāhea i te tātā’i, ia ‘ore te feiā fa’a’amu tio e fifihia ‘ananahi.
« Hō’ē ‘āhuru mahana ‘aita te ua i fa’aea io mātou, tei ‘i’ō ri’i paha te tahi tāfifira’a. Nō’u noa terā mana’o, nō te mea e tahe mai terā mau vari nō uta mai i roto i te mau ‘ānāvai. E nehenehe ato’a e parau, mea faufa’a teie mau tuatāpapara’a ta teie mau ‘aivāna’a nō Tahiti mai », i te reo ‘o Joël Hahe, te tāvana tuha’a nō Poutoru.
I roto e piti ‘āva’e, e rave fa’ahouhia te mau hi’opo’ara’a ‘āpī nō te fa’aoti tāmau noa anei ra teie ‘ohipa ‘aore ra ‘aita.
