Mai te ha’amatara’a mai teie ma’i i te parare i pōrīnetia nei ‘i te ‘āva’e tiunu ra, tai’o-hia 313 ta’ata ma’i. E au noa ā te mau hi’opo’ara’a ‘a te pū āraira’a ma’i, 11 ‘o rātou tei mou roa ‘i te fare ma’i rotopū ia rātou ‘e 8 ‘aiū raro mai ‘i te 8 ‘āva’e.
I te hepetoma nō te 6 no novema ra, 39 ta’ata ma’i ‘āpī tei ‘ite-hia mai: 36 i Tahiti, ‘e piti i Mo’ore’a ‘e hō’ē ‘i Tubuai. E ‘i rotopū ia rātou, ‘e maha ‘aiū raro mai te 6 ‘āva’e ‘e maha tamari’i mai te 1 haere atu i te 6 matahiti. 12 taure’are’a mai te 7 tae atu i te 17 matahiti 18 ta’ata pa’ari mai te 18 haere atu i te 79 matahiti ‘e hō’ē matahiapo hau i te 80 matahiti. E ‘aita hō’ē a’e ‘o rātou ‘i mou ‘i te fare ma’i.
‘Āre’a ‘i te hepetoma ‘i ma’iri a’e nei, hō’ē ‘aiū raro mai te 3 ‘āva’e tei tāpe’a-hia ‘i te fare ma’i ‘e ua pohe roa. Teie te ma’i teimaha roa tei ‘ite-hia no roto mai teie ma’i pe’e.
E ha’amata teie ma’i mai te ma’i hota ra te huru, e tahe te hūpē, fiva ‘e ‘e hota ato’a te ta’ata ma’i. Tera ra, muri mai e piti a’e hepetoma, e pūai atu te hota ‘e fifi roa te hutira’a aho.
Te fa’aha’amana’o fa’ahou nei te pū āraira’a ea ia tātou te faufa’a ia fa’atura te mau rāve’a pārurura’a ia ‘ore teie ma’i pe’e ia parare atu ā. E ia fa’a’ohipa te pāruru vaha e ia horoi tamau i te rima.
