21 i te tīti’ara’a hou te hope’a, 10 tei tāpe’ahia e te tōmite pūrotu Tahiti nō tāna mā’itira’a. Ta’a’ē noa atu i te mono mātāmua o te purotu Arue 2025, nō te rahira’a o teie mau pōti’i a tahi nei ‘a porotē ai i mua i te ta’ata.
I te po’ipo’i mōnirē, te mau pāpa’i ve’a, te mau ‘ona ‘e te mau feti’i tei tāpapa atu i teie fa’a’ite’itera’a. « Māta’ita’i noa vau te ‘āfata teata, ‘ite ana’e au i te mau purotu, te hina’aro ato’a nei au e ‘tūrama ‘anapa mai ia rātou. Tā’u fā, te hina’aro nei au e hōro’a i te ti’aturi, i te mau ta’ata e mana’o ra ‘e’ita e mara’a ia rātou… ‘ia hina’aro ‘oe e tāpae ihoa ‘oe i te hope’a » Rahera Moutame, purotu nūmera 10.
I teie matahiti, ‘ua fa’anu’u te tōmite fa’atere te matahiti o te mau poti’i nō te pe’e i te ture roto o te mā’itira’a purotu nō Farāni. 4 rātou tei hau atu i te 25 matahiti, hō’ē 30 ana matahiti. Mā’itira’a purotu te tupu i teie matahiti i te fare ‘oire nō Pira’e. « Nō te mea i te fare ‘oire no Pape’ete te vai ra te mau tāta’ira’a. I teie matahiti, fa’a’āpī fa’ahou, ‘ohipa fa’ahou ia nō mātou te tōmite tata’u », i te reo o Rava Sachet, mero no te tōmite fa’atere purotu Tahiti.
E mai te mea, te 65ra’a teie o te tata’ura’a purotu Tahiti, ‘ua fa’aoti te tōmite e rave mai te tumu parau o te mau ‘ahu purotu mai te tau tahito tae mai i teie mahana topahia te i’oa « time machine ». « ‘Āru’i rautīhia e Sylvie Tellier, te fa’atere tahito nō te taiete purotu Farāni ‘āpitihia e Hinarere Taputu, pūrotu Tahiti 2014.
I teie ‘āva’e tiunu e monohia ‘o Temanava Domingo, tei fa’a’ite ā i roto i te ve’a reo farāni a TNTV nō te pō mōnirē 28 no ‘ēperēra, ‘eiaha te purotu Tahiti ia mata’u ‘i te parauparau tōna reo ‘e ia riro ‘oia ‘ei hi’ora’a no te u’i ‘āpī. « Ua tui te ro’o ‘o teie mā’itira’a purotu tahiti, ‘eiaha ra ia mo’ehia i teie mau tamahine, te nehenehe o hō’ē purotu, tōna māfatu nā mua roa. Tā’u teie poro’i ia rātou », i te reo fa’aitoito o te purotu Tahiti 2024, Temanava Domingo.
Mai te avatea mōnirē, ‘ua matara te mā’itira’a i ni’a i te niuniu putu poro’i, tai’ohia 20% o te nota hope’a a te tamahine tata’u. 10% nō te tā’ere, 40% ‘e 30% o te nota nō te mau uiuira’a hope’a i te pō mā’itira’a ‘e te huru o te tamahine i te taime porotēra’a. E tupu te ‘āru’i mā’itira’a i te 27 nō tiunu i te fare ‘oire nō Pira’e, ‘āre’a te ru’i ta’urua, ‘ua tārenahia te reira i te 31 no mē i te hōtera Intercontinental nō Faa’a.
