« ‘Ua ‘āpī te tā’ato’ara’a ‘o tā tātou mau ‘āma’a ‘ohipa nō te fari’ira’a rātere, te parau nō te pūhapara’a ‘i roto ‘i te mau hōtēra ‘i ni’a i te pāhi ‘aore rā ‘i roto ‘i te mau ‘utuāfare, ‘e’ere rā ‘i te mara’ara’a mai tei orahia mai ‘i te matahiti 2019 rā. 92% ‘o te mau rātere tei fa’a’oti ‘e fa’aea ‘i te hōtēra ‘aore ra ‘i te mau nohora’a ‘utuāfare. Te mau rātere nō te pae mārite ‘apato’erau (7 250 rātere hau ia fa’aauhia ‘i te matahiti 2019 ra) ‘e te mau rātere nō Farāni (9 030 rātere hau ‘ia fa’aauhia ‘i te matahiti 2019 ra) tei haere rahi mai ‘io tātou. ‘E te ho’i marū mai nei te fāito rātere ‘i ‘itehia ‘i te matahiti 2019 » te ha’apāpūra’a teie ‘a te pū nūmerara’a ‘a te ISPF.
Tā tātou pū nūmerara’a tei ‘ite ato’a hō’ē mara’ara’a o te mau vāhi tā’otora’a ‘i fa’a’aufauhia : « nō te mau pō tā’otora’a, hau ‘i te toru mirioni ‘e hitu hānere tauatini farāne te moni ‘āpī (hō’ē mara’ara’a ‘i ni’a ‘i te faito 5.6% ia fa’aauhia ‘i te matahiti 2019), piti mirioni toru hānere tauatini farāne nō roto mai ‘i te mau pūhapara’a mea tāmoni. Rahi ato’a te mau rātere ‘i fa’a’ea maoro mai ‘io tātou, tei ni’a ‘i te faito 15% te fa’a’ea mai nei ‘ahuru mā hitu a’e mahana ‘i roto ‘i tō tātou mau motu, ‘i reira, mara’a ato’a te rahira’a piha ‘i fa’a’aufauhia, 6% ‘ia fa’aauhia ‘i te matahiti 2019 (hau ‘i te 130 000 ro’i tārahuhia) »
‘I te pae ‘o te mau rerera’a manureva « ‘ua ‘aifaito noa te mau rerera’a nā rapae mai te mau tere ‘i ‘itehia nā mua atu ‘i te tau ‘o te ma’i Covid-19 are’a te mau rerera’a ‘i roto ‘i te mau motu, ‘ua mara’a ‘ia te reira ». 7 666 tere ‘i roto ‘i tō tātou mau motu ‘i te matahiti 2022, 7 593 ‘i te matahiti 2019.
Hau roa atu, mai te ‘āva’e tenuare haere atu ‘i te ‘āva’e tetepa 2022, ‘ua mara’a te ‘āpī ‘ā te mau taiete ‘e ‘ohipa nei ‘i roto ‘i te fāri’ira’a rātere (+46% ‘ia fa’aauhia ‘i te matahiti 2019). ‘Āre’a nō te mau pū ho’ora’a tīteti, ‘ua topa tā rātou moni ‘apī ‘i ni’a ‘i te faito 56% ‘ia hi’ohia ‘i te matahiti 2019, ‘āre’a nō te tōe’a ‘o te mau tuha’a ‘ohipa ‘o te fāri’ira’a rātere, ‘ua mara’a tā rātou ‘āpī ‘i ni’a ‘i te faito 48%. Hau roa atu, ‘ia au i te pū’ohura’a ‘a te pū nūmerara’a ISPF, mara’a ato’a te ‘imira’a ‘ohipa ‘a te mau taiete fāri’ira’a rātere ‘i Pōrīnetia ‘ia fa’aauhia ‘i te matahiti 2019.
