I teie po’ipo’i mahana maha 26 nō tetepa 2024, te fa’aterehau nō te ha’api’ira’a ‘e te fa’atere nō te pū DGEE tei ‘ōpere i te parau ha’apāpūra’a « Cambridge » ‘i te mau piahī tuarua, 233 rātou i teie matahiti. I teie matahiti, ‘ua mara’a fa’ahou te fāito ‘ia fa’aauhia i tō Farāni. « Tāpa’o ia terā, mea ‘aravihi roa tā tātou mau tamari’i i te parau nō te reo peretāne. Mai te mea, ‘ati ti’a a’e ia Pōrīnetia te mau fenua te fa’a’ohipa nei te reo peretāne ihoa ra. E mea ‘ana’anatae ato’a i tā tātou mau tamari’i i te fa’a’ohipa i teie nei reo… », i te reo ‘o Ronny Teriipaia.
Parau ha’apāpūra’a teie e ‘ite nei te ‘aravihi o te hō’ē piahī i te fa’a’ohipara’a i te reo marite ‘e te ‘īriti nei te ‘ūputa ‘o te tahi mau tōro’a ‘ohipa teitei i roto i te ao nei. E tupu te mau hi’opo’ara’a i te ‘āva’e ‘ēperera nō te mau piahī piha « terminale » e hina’aro nei e tata’u o te rave atu i teie hi’opo’ara’a a 3 matahiti i teie nei ‘e e 9 mau fare ha’api’ira’a tei natihia i roto i teie fa’aaura’a e te fare ha’api’ira’a teitei nō Cambridge. « Mea fa’ahiahia roa nō rātou nō te mea e nehenehe tā rātou e tītau ‘ōhie noa te ti’ara’a teitei, mai te ‘orometua ānei te mau pū a te hau fenua ‘aore ra nā te ara. Mea ‘ōhie a’e nō te ‘īritira’a i te mau ‘ūputa i roto i te mau fare ha’api’ira’a teitei. Te vai ra te mau fare ha’api’ira’a teitei te tītau nei i teie parau », i te hi’ora’a a te fa’aterehau Ronny Teriipaia.
233 piahī tei tāpae i te hope’a o teie tata’ura’a, 30 tei haru mai i te ti’ara’a ‘aravihi i roto i te pāpa’ira’a, te tai’ora’a ‘e te ‘āparaura’a nā roto i te reo marite. Teie te tahi parau ha’apāpūra’a hau atu i te parau tū’ite BAC tā teie mau taure’are’a e mau nō te tomo i ni’a i te mātete o te ‘ohipa.
