No matara noa mai ra ho’i te feia fa’a’amu ‘ōura ‘i te ho’ē tau ‘āva’e fifi, tei ha’apohe te rahira’a ‘o tā rātou mau ‘ōura na’ina’i i te ‘ōmuara’a ‘o te matahiti. Teie fa’ahou ā tetahi fifi, te ‘eiara’a.
Ua ‘eiahia te mau ‘ōura miti ‘a te taiete Mitirapa Blue Pearl Shrimp ‘i Toahotu. « Te hopu tamau nei mātou ‘i roto ‘i te mau ‘āua. ‘I te mahana mā’a ‘i ma’iri a’e nei, ‘aita ho’ē a’e fifi ‘i ‘itehia. ‘I teie ra mōnire nei, ua ‘itehia tetahi mau ‘ūpe’a tei tapūhia » te reo pe’ape’a ‘o Poerani DURAND ho’ē ‘o te mau rave ‘ohipa ‘a te taiete. ‘E ia ‘āmuihia, piri ‘i te maha hānere kiro ‘ōura miti tei ‘eiahia, ho’ē mirioni te ‘āfa te ha’amāu’ara’a ta teie ‘ohipa ‘ī’ino ‘i fa’atupu.
‘E’ere teie te taime mātāmua ‘ā ‘eiahia ai tāna mau ‘ōura. « ‘I te taime mātāmua, ‘aita mātou ‘i horo teie ‘ohipa ‘ī’ino. ‘I teie hāerera’a, ua rava’i. Ua mā’iti te feia ‘eia te mau ‘āua ‘e ua pa’ari te mau ‘ōura miti. ‘E horo mātou teie ‘ohipa » Poerani DURAND. ‘E tia’i ‘e pae hāere atu ‘i te ono ‘āva’e no te fa’a’amu ‘e ia pa’ari te mau ‘ōura miti nō te ho’ora’a.
Te pi’i nei te taiete ‘i te mau hoani ia fa’aāra ‘oi’oi ia rātou, ia ‘ite noa atu ‘outou ‘i te ho’ē ho’ora’a ‘ōura miti huru’e ‘i te pae pūrumu aore ra ‘i ni’a i te tahua nātirara.