‘Ua ‘itehia te mau maita’i tā te mau tumu rā’au e fa’atupu i ni’a i te orara’a o te ta’ata. Hau a’e rā, tītauhia e ara, te tumu ia ravehia te mau hi’opo’ara’a. « ‘Ua hi’opo’ahia te mau tumu rā’au fatuhia e te hau fenua i te ‘oire nō Pape’ete i te ‘āva’e novema ra. E 2 fā tō teie fa’anahora’a, a tahi, ‘atu’atu i teie faufa’a nātura. A piti, tīti’a i te mau tumu rā’au e nehenehe e ha’afifi i te ta’ata. ‘Ua topa mai te mau pū’ohura’a tau mahana i teie nei. I ni’a 480 tumu rā’au (raro a’e i te ti’a’aura’a a te hau fenua), 460 e mea maita’i. 20 tumu rā’au e tano ‘ia tāpū-‘oi’oi-hia« , i te reo o Jordy Chan, fa’aterehau nō te mau patura’a, ti’a’au i te utara’a nā te reva, nā te fenua ‘e nā te moana.
« ‘UA TUPU TE ‘OIRE I PĪHA’I IHO I TEIE MAU TUMU RĀ’AU, PENEI A’E TE VAI RA ‘UA TĀPŪPŪHIA TE MAU A’A »
Rémy BRILLANT, ra’atira ‘o te mau piha ‘ohipa a te ‘oire nō Pape’ete
Ei ha’apāpūra’a, nō te tumu rā’au tei hi’a mōnirē rā ‘i Pā’ōfa’i, tei raro a’e ia i te ti’a’aura’a a te ‘oire, ‘aita ia ‘ona tei roto i terā rahira’a tumu rā’au i hi’opo’ahia e te mau ‘aivana’a a te hau fenua. Teie ra, ‘ua topehia na tāua tumu marumaru ra i te ‘āva’e nōvema i ma’iri a’e nei, e te hi’opo’a-tāmau-hia nei, mai te tā’ato’ara’a o te mau tumu rā’au nō Pape’ete. « E mau tumu rā’au tei tanuhia i te ārea matahiti 1920, 1930. ‘Ua ‘ite teie mau tumu rā’au mea nāhea te ‘oire i te tupura’a (…) Nō tāua tumu marumaru rā tona fa’ati’ara’a tei fifi na. ‘Aita e maura’a fa’ahou tō te mau a’a« , i te reo ‘o Rémy Brillant, ra’atira o te mau piha ‘ohipa a te ‘oire nō Pape’ete. « I te mau matahiti ato’a ‘ia piri mai te tau ua, e topehia te mau tumu rā’au. E hi’ohi’o te mau rave ‘ohipa i tō rātou huru. Nō te mau tumu ‘ua tāpūhia te mau ‘āma’a, penei a’e ‘ua o te pape i roto. E nehenehe te reira e ha’aparuparu i te tumu. Mea tano ‘ia hi’opo’a-hu’ahu’a-hia te mau tumu rā’au ato’a. E fa’ata’ahia hō’ē tāpura faufa’a ‘ia ravehia teie tāpura ‘ohipa. E’ere i te ‘ohipa na’ina’i« .
« ‘ia fa’a’orehia hŌ’Ē TUMU RĀ’AU, TĀPA’O IA E ‘AITA E RĀVE’A ‘Ē ATU »
Jordy Chan, Fa’aterehau nō te mau patura’a
I rotopū nā tumu rā’au 20 e tāpūhia i roto i te ārea e toru ‘āva’e, ‘i Pape’ete te vai ra te mau marumaru ‘ua hānere te matahiti (hō’ē i te aroā Pouvana’a a O’opa, e 2 i te porōmu i te pae miti o tei tāpūhia i te pō mahana toru), te mau tumu ‘āpara vare’au, te mau tumu ‘uru, te mau tumu ha’ari ‘e te mau tumu faifai pāpa’a : « I teie mau tau i mua nei, e ravehia te tahi mau fa’anahora’a i ni’a i teie mau tumu rā’au. E tano ato’a ra i te parau, ‘ia fa’a’orehia hō’ē tumu rā’au, tāpa’o ia e ‘aita e rāve’a ‘ē atu », ‘ia au i te fa’aterehau nō te patura’a.
E pūpūhia te mau tāpū rā’au nā te mau piahi o te pū tōro’a rima’ī, ‘ia ha’afaufa’ahia. E monohia te mau tumu rā’au ato’a e tāpūhia.
Nā te ravera’a a te ta’ata i ha’afifi te tupura’a o te mau tumu rā’au
Te fa’a’ite ra te mau pū’ohura’a i fa’ataehia i roto i te rima o te hau fenua, nā te ravera’a a te ta’ata i ha’afifi te tupura’a o te mau tumu rā’au : « nā te mau herura’a i ravehia i mūta’a ra nō te mau patura’a i ha’afifi i te mau a’a, nā te mau a’a e tāpe’a i te tumu rā’au nō tōna tupura’a. Terā ia tā tātou e ‘ite ra i teie nei mahana », i te reo o te fa’aterehau.
