‘Ua fati teie ‘auri i te pō tapati. E mai te mea ra e ha’amā’arohia te pape vi’ivi’i ‘i te pū nō Ta’apuna hou a fa’aru’ehia atu ai i tua, e nehenehe ra te reira i te fa’atupu i te fifi i ni’a i te ea ‘o te ta’ata.
Te tumu ia hō’ē pupu ta’ata hopu nā raro ‘i tono-rū-hia ai, nō te hi’ora’a tei hea mau na te vāhi i fati. Teie rā nō te vi’ivi’i o tā te pape ‘e nehenehe e fa’atupu, tītauhia e tāmā maita’i i te tino i muri iho ‘eiaha ia pirihia e te mau tirotiro.
« Nāna e hi’o maita’i eaha mau na te fifi nā pīha’i iho i te ‘auri ‘e eaha ato’a te mau rāve’a nō te tātā’i », i te reo ‘o Nicolas Bertholon, mono tāvana nō Puna’auia.
‘Aita ‘i māoro a’e nei, ‘ua rave nā te pū aupuru a ea i te mau hi’opo’ara’a ‘i Vaipo’opo’o e te mā noa ra ia te pape : « te pape nō roto mai ‘i te pū ha’amā’arora’a o te fa’aru’ehia nei i roto i te miti, pāpū e hopue ihoa ‘ona. E rahi ato’a te tirotiro. ‘Ua tarēna mātou hō’ē hi’opo’ara’a ta’a’ē ‘ananahi, nā te reira e fa’a’ite mai te peu te vi’ivi’i i fa’aru’ehia nei i te ateara’a 13 metera ‘i te pae tahatai e ho’i mai oia ‘i te vāhi ‘o tā mātou e hi’opo’a tāmau nei, te aura’a, piri atu i teie ‘auri pape« , te mau ha’apāpūra’a a Mélinda Mélix, te ra’atira o te pū aupuru a ea.
‘Ia au i te ‘oire, e fa’ahepohia ra e tātā’i i te mau fa’atorora’a ‘auri pape, ‘ua tohuhia hau i te hō’ē toma pae miriā farāne te ha’amāu’ara’a. Nō teie nei taime, tītauhia i te feia hopu ‘e ‘au e fa’a’oroma’i mai.
