Piti vahine te ‘ohipa atu ‘i roto ‘i teie niu ‘āpī nō te pārurura’a to’a i Pōrīnetia nei. Laetitia Hédouin te ‘aivāna’a ‘e ‘o Flora Artzner te ‘aito hōrue tā’ie, rāua te fa’atere teie tā’atira’a Science4reefs i raro a’e ‘i te ārata’ira’a ‘a te pū mā’imira’a ‘ihi nō Farāni, te CNRS.
‘Auaha’ati ia Mo’orea 2% ana’e ‘o te mau ‘āoa te oraora nei. ‘I teie mahana te tauto’o ra’a ‘a Laetitia Hédouin, te peretiteni ‘o teie tā’atira’a Science4reefs, ia ha’amāramarama-hia te ta’ata i ni’a ‘i te faufa’a ‘o te pārurura’a to’a mā te tauturu te mau ti’amana no te fa’anaho te mau rāve’a pāruru. « Te fifi nei te mau to’a, nā roto anei ‘i te ahura’a ‘o te miti tei ‘ite-hia ‘i roto i te ārea matahiti 2009 ‘e teie ato’a matahiti. Te māteateara’a ‘o te to’a tei fa’atupu ato’a te māna’ona’ora’a ‘i roto i te nūna’a. Tāpiri mai te taramea ‘e vetahi mau remu, ‘i teie mahana, ‘aita ‘e pāpū mai te mea pohe ana’e hō’ē ‘āoa ‘e rōa’a fa’ahou i te fa’aora iana ».
‘I mana’o ato’a ai nā vahine ‘e piti ‘e rave tetahi tuatāpapara’a, ‘e ua tāpiri ato’a mai te ‘aito hōrue tā’ie Flora Artzner, ‘aivāna’a ato’a teie nō te pū Crioce nō Mo’orea hou ‘a riro mai ai ‘ei ma’ona hōrue. Te ha’apāpū nei ‘oia ‘e ua ta’ero roa te to’a, ‘aita atu ‘e rāve’a, te ta’ita’ira’a te ve’a i roto ‘i te nūna’a. ‘Ia ti’a mai rātou ‘eiaha noa nō te pārurura’a ‘i teie faufa’a moana nō te u’i ra nō ‘ananahi. « Te rohi nei mātou no teie u’i nō ananahi, ia hopu ana’e rātou ‘i te miti, ‘aita hō’ē a’e pehu ‘urina, ia vai mā noa. Tā mātou ia tauto’ora’a, ia vai ‘oa’oa noa teie mau tamari’i ‘e ia ‘ite ato’a rātou te faufa’a o te moana ‘e ia tāmau noa teie ha’api’ira’a ‘a tau ‘e ‘a tau ».
Ua ‘īriti teie tā’atira’a Science4reefs i te hō’ē tahua natirara no te pa’epa’e te mau ‘ōpuara’a mā’imira’a ‘e te ha’api’ira’a nā te mau tamari’i. E te fa’ari’i ato’a nei rātou i te mau rahu’a ‘e te feiā pata hoho’a nō te ‘aitaui i ni’a ‘i te ta’ero o te mau to’a.
