« ‘E piti huru rori tā mātou e fa’a’amu nei, te vai ra te rori tītī ‘uo’uo, te holothuria fuscogilva ‘e te rori tītī ‘ere’ere, te holothuria withmaei. ‘Ua rave mātou i te mau mā’imira’a ‘e ‘ua tae tā mātou mau hi’opo’ara’a i te paraura’a e, te vai ra te tao’a nō te tūra’i te pa’ari ‘o te tino ta’ata ‘aore ra te fa’a’āpīra’a ‘o te tērura. E rāve’a ihi anoha’a nātura teie, i te mea, ‘e rōa’a ‘ōhie noa ia mātou i te ‘īriti mai teie mau mono’i parai hāmani naturahia nei ‘e teie mau ‘ānimara. » ‘Ua hāmani mātou ‘hō’ē parau fa’ati’a » i te reo ‘o Kahaia Buluc, mono ra’atira nō te taiete Tahiti Marine Product.
‘A tahi nei ‘ohipa mai teie huru ‘a ravehia ai i te fenua nei. E riro teie mau mono’i parai ‘i te ho’ohia hou a’e i teie hōpe’a matahiti, ‘i Tahiti e ‘i te fenua ‘Ātia mā. I te matahiti ma’iri a’e nei, ‘ua tere atu te mau ti’a nō te taiete Tahiti Marine Product ‘e e toru mau taiete ‘i te fenua Singapour nō te fa’atīaniani ‘i tā rātou mau ‘ōpuara’a, tere fa’anahohia e te pū tapiho’o ‘e tapiha’ara’a.
« E mātete pāpū teie nō te fa’atīaniani teie ‘imira’a faufa’a. ‘Ua ‘ite te mau matahiapo nō ‘Ātia ‘i te mau maita’i nō roto mai i te rori. Teie taime te fāfā nei mātou i teie mātete, ‘e’ita rā mātou e fa’a’ea noa i’ō. »
‘I Vaira’o te mau rori e fa’a’amuhia ai, i reira ato’a tōna vai e ‘īritihia ai nō te fa’a’ohipa ‘ei mono’i parai. ‘E’ita te ‘ānimara’a e ha’apohehia nō teie tāpura ‘ohipa ra, ‘ia oti e tu’u fa’ahouhia te rori ‘i roto i te tahi mau ‘āua, rāve’a pāruru i teie faufa’a moana.
« Te vai ra te fare ha’apatara’a ‘e te piha fa’a’amura’a, ia pa’ari maita’i rātou, e tu’uhia atu ai ‘i roto i te mau ‘āua ha’amauhia i te tai roto. ‘Ua fa’anaho mātou hō’ē fa’a’apura’a hotu moana au noa…te varavara noa atu ra teie mau rori, te fa’a’ohipa nei mātou te mau rāve’a ato’a nō te pāruru i teie ‘ānimara. »
Te ‘imi fa’ahou ra teie taiete i te tahi atu mau tao’a hāmanihia e te natura.
