‘Ōmuahia teie tata’ura’a Toa Reef ‘i te ‘āva’e tiurai ra, tata’ura’a nō te turu ‘e fa’anahanaha ato’a te mau ‘ōpuara’a maita’i roa a’e ‘i te parau ‘o te pārurura’a ‘i te mau to’a ‘e te mau tairoto nō pōrīnetia. Fa’anahora’a teie rautī-hia ‘e te hau nui ‘e te hau fenua, teie ato’a pū Ifrecor e te Cluster Maritime. Nō teie tata’ura’a 32 tinotītaura’a tei tāpa’ohia teie matahiti. I te pō mahana toru ra, 13 rē tei ‘ōpere-hia ‘e te tōmite hi’opo’a ‘a te pū Ifrecor. Nō te rē mātāmua, haru-hia mai ia ‘e te tā’atira’a Te mana nō te tairoto, nō tāna fa’anahora’a Firi a’au, ‘ōpuara’a nō te hi’opo’a ‘āmui te ha’apatara’a ‘o te mau huero to’a, fa’anahora’a ārata’ihia mai ‘e Vetea Lliao, 1 mirioni moni farane te tauturu moni tā rātou ‘i fāna’o maoti teie rē.
14 fare ha’api’ira’a tei nati-ato’a-hia ‘i teie fa’anahora’a, ‘e piti tei haru mai te rē ta’a’ē, ‘oia ho’i te fare fa’au’i mā’ohi nō Rimatara tae noa atu te fare ha’api’ira’a nō Paofa’i, te pū dgee tei ‘haru ato’a mai te tahi rē fa’ahiahia nō te mau ‘ōpuara’a pārurura’a fa’anahohia mai ‘e tāna mau fare ha’api’ira’a tuatahi ‘e tuarua ‘e 6 ato’a ra. ‘Are’a te rē nō te mau rāve’a ‘āpī haru-hia mai ia ‘e te tā’atira’a Coral Gardeners ‘e te rē o te mau motu ‘ua haere ia ‘i te tā’atira’a Mokarran Protection Society nō tāna mau fa’anahora’a nō te pāruru te ma’o taumata.
‘Ohipa fa’ahiahia nō Alexander Mataarere, mero nō te tā’atira’a Mokarran Protection Society, « nā mua roa, nehenehe ‘e parau, ‘ua rave ihoa te hau fenua ‘i te pārurura’a, ‘eiaha ia tāi’a-hia te ma’o i roto ‘i tō tātou nei moana, parau fa’ahiahia roa tenā. Teie nei tā mātou tā’atira’a, te ono-ra’a ‘o te matahiti tuatāpapara’a te huru ‘o tōna orara’a, tōna fa’anahora’a, te huru ia i Ra’iroa. Te hina’aro ato’a ra mātou, nō te mea pauroa terā mau ma’o ‘ōvahine te pou mai ra ‘i Ra’iroa, te hina’aro ra mātou ‘e ‘ite teihea rātou ‘i te fānaura’a, ‘ia nehenehe mātou ‘e te ‘oire pā’ato’a ‘ia pāruru teie mau fa’aeara’a ‘o teie mau ma’o ».
Teie mau ha’amāramaramara’a, horo’a-hia nā mua roa ‘i te huira’atira, te ‘āpo’ora’a ‘oire ‘o te motu ‘e te fa’aterera’a fenua ‘i te mea teie ‘ohipa pārurura’a ‘i tā tātou faufa’a moana tītau-hia ‘ia rave ‘āmui. Muri mai ta’ita’i roa-hia ai teie mau parau ‘i roto i te mau fare ha’api’ira’a, ‘i te mea iau ‘i teie tā’atira’a nō rātou ato’a teie parau.
I te reo noa ā ‘o Alexander Mataarere, ono matahiti teie nei rātou ‘i te fārerei noa ra’a te huira’atira nō te tuamotu nō te tuatāpapa te parau ‘o te pārurura’a ‘i te ma’o taumata « ‘ua tere mātou nā roto te mau ‘utuāfare tāta’i tahi nō te fārerei ‘eaha te ‘ohipa ‘e nehenehe ‘e rave, ‘ia rave ‘āmui mātou te ‘ohipa. Nehenehe ‘e parau, mai teria tuatāpapara’a ‘i roto i te huru ‘o tō mātou huira’atira, mea nā reira mātou ha’amata mai ai te mau tuatāpapara’a tae roa mai teie mahana nō te mea rātou tō roto. Mātou tā’ato’a tō roto, te ‘oire, feiā rāva’ai pauroa te fenua tā’ato’a tei roto tāua fa’anahora’a. »
Te fa’ahiahia rahi nei teie tā’atira’a ‘i tāna rē 500 tauatini moni farane te riro ‘ei tāpa’o ha’amāuruurura’a i tā rātou ‘ohipa i roto i te mau motu ‘ei rāve’a ato’a ra nō te fa’atianiani fa’ahou ā te faufa’a ‘o tā rātou ‘ohipa pārurura’a ‘i te mau ma’o ato’a ‘i te rurura’a i ni’a ‘i te moana ‘a te mau hau ‘āmui te tupu ‘i teie ‘āva’e tiunu ‘i muri nei ‘i te ‘oire nō Nice.
