62 matahiti tō Chris Brown, ‘e peretāne teie ta’ata ‘e e fatu taiete patu fare. ‘Ua ha’amata teie ‘ōpuara’a tāna ‘e ta’ahi ‘i te mau vāhi ‘e ‘aita ‘e fenua ‘aore ia ‘e ta’ata tāpiri, i te matahiti 2016 nā roto i tōna ‘āparaura’a ‘e ‘o Buzz Aldrin, hō’e ‘o nā ta’ata ‘e piti ‘i ta’ahi mātāmua ‘i ni’a i te ‘āva’e. ‘E no roto mai ‘i teie ta’ata ‘i tere nā te reva, tōna fa’aro’o mātāmua ra’a te parau ‘o te mau vāhi ātea roa a’e ‘o te ao nei. Piti matahiti muri mai, ‘ua fārerei ‘oia i te tahi mau ta’ata tei pa’i’uma ‘ina mōu’a teitei roa a’e ‘e 7 ‘o te ao nei. Mai reira tōna ha’amata’ara’a i tāna mau mā’imira’a ‘i ni’a i te mau vāhi ātea roa a’e ‘o te ao nei.
‘Ua tere ‘o Chris Brown ‘i te fenua ‘Āfirita, ‘ua fa’aruru te tama’i ‘e te ataata ‘o te aru, mea nā ni’a ‘oia i te manu tautau ‘e ua ārata’i hia e te fa’ehau nō te ta’ahi ‘i te vāhi ātea roa a’e o teie tuha’a fenua. Maha matahiti tōna fa’aineinera’a ‘i tōna tere i te poro apato’a ‘o te paraneta. Nō teie taime, 80 fenua tāna i tere, ‘e ‘e 6 vāhi atea roa a’e ‘o tāna i ta’ahi ‘e 2 teie ‘e toe rā iāna nō te fa’ahope ‘i tōna tere. « Matahiti 2016 ra te ha’amatara’a, ‘ua tere vau ‘i te vāhi ātea roa a’e ‘o te pae apato’a ‘o te ao nei…’i te taime ‘i tāpae ai māua, ‘ua parau mai te paireti manureva, te vai nei ‘e 5 vāhi ātea roa a’e ‘o te ao nei. Mea nā reira vau ‘i te mana’o ra’a e tere ‘inā 8 vāhi mai teie te huru » Chris Brown, inutai.
‘I Pōrīnetia nei teie metua tāne ‘ape’e hia ‘e Andriy Bratash tāpena pahī ‘o te Hanse Explorer, pahī fa’ata’a hia nō te fano ‘i te mau vāhi ‘e’ita te mau pahī ato’a ‘e tāpae. 15 ‘īhitai ‘e ‘ohipa ra ‘i ni’a i teie pahī, ‘e te rahira’a ‘o te taime, te mau ‘aivāna’a ‘e te feiā mā’imi tāna ‘e fa’ari’i nei. « ‘E’ere ‘i te mea pinepine ‘i te fa’ari’i te mau ta’ata mai ia Chris Brown te huru, tera rā ‘i ni’a i te pahī Hanse Explorer ‘e fano pinepine mātou ‘i te mau vāhi ‘e ‘aita hō’ē a’e ta’ata ‘e fano rā » Andriy Bratash, te tāpena pahī Hanse Explorer.
‘Ua pea hia teie metua tāne ‘i roto ‘i tōna mau tere, matahiti 2023 ra, ‘ua ‘ōpua ‘oia ‘e haere ‘e māta’ita’i te pahī Titanic ‘i raro ‘i te moana. Terā ra, ‘i te taime ‘a tomo ai ‘i roto i te pahī hopu nā raro ‘i te moana, ‘ua ‘ōtohe. « ‘Ua inu vau te pia, ‘e ua fa’ari’i vau ‘e tere nā muri ‘ina 5 ta’ata ‘i ‘ōpua ‘e māta’ita’i i te pahī Titanic, terā ra tō’u ‘ite ra’a te huru ‘o te pahī hopu moana, ‘ua ri’ari’a vau ‘e ‘aita paha ‘e tere maita’i teie ‘ohipa. ‘Ua pa’a’ina te pahī ‘i te taime poura’a ‘i raro i te moana ».
‘Aita rā teie ‘ati ‘i ha’atūtāperepere te mana’o ‘o Chris Brown, ‘i te mea, te tamau noa ra ā ‘oia i te tere ‘i te mau vāhi ātea roa a’e ‘o te ao nei. ‘I rōpū ‘i te moana pātitifā ‘apato’a ‘o Chris Brown hou ‘a tīpae mai ai ‘i Pōrīnetia nei, ‘aita ‘e fenua tāpiri, ua ‘au ‘oia i teie vāhi pi’ihia « Point Némo » ‘e tāna tamaiti. Nō te tāpae ‘i teie tuha’a moana, nā te fenua Tīreni rāua ‘i te fanora’a ‘e te pahī Hanse Explorer, tere atu ai nā Rapa nui, hou ‘a tāpae atu ai ‘i rōpū ‘i te moana ‘a Hiva.
‘I Tahiti nei »oia’o Chris Brown nō te ta’ahi ‘i te vāhi ātea roa a’e, ‘e ua ‘ite hia mai ‘e āna ‘i ni’a i te hō’ē mou’a 203 metera i te teitei.
