I te ārea nō te hora 8 i te pō teie nei uahi i te tupura’a. ‘Ua tāpapa atu te mau fa’ehau tūpohe auahi nō Pira’e, Pape’ete, Fa’a’a i Tipaeru’i nō te tinai ia na. Nō to rātou vitiviti, i ‘ore ai te uahi i ‘ū’ana roa atu, ‘aita ato’a te mau taiete tāpiri ia Technival i pa’apa’a. Nô te ataata o te mau tauiha’a e vai ra i tāua taiete ra ‘ua ‘āmui ato’a atu te mau fa’ehau nō te pū pārurura’a tīvira. « I te taera’a atu te mau fa’ehau, ‘ua pa’apa’a roa hō’ē tuha’a, toe noa mai te mau ‘apa’apa ‘auri », i te reo ‘o Cédric Rigollet nō te pārurura’a tīvira.
‘Ia ‘ore te uahi ‘ia pārere atu, ‘ua fa’a’ohipa te mau fa’ehau i te mau rāve’a ato’a nō te pāruru eiaha te tahi atu mau taiete tāpiri ‘ia ura. E maha pere’o’o tūpohe auahi tei tonohia, hō’ē pere’o’o uta ma’i, ‘ia ‘āmuihia, piri i te 30 ta’ata tei ‘ohipa i Tipaeru’i nō teie nei ‘ati.
« Mea pe’ape’a ato’a ‘ia tupu ana’e te tahi mau ‘ohipa mai terā, nō te huira’atira ihoa ra. ‘Aua’a mea ātea tātou i te ‘oire. ‘Aita ato’a e pāpū roa ra te tumu o teie auahi », i te reo ‘o Rémy Brillant, te pāpa’i parau rahi nō te ‘oire nō Pape’ete. Nō reira, e ha’amata te mau tītorotorora’a.
‘Aita e ta’ata i pēpē nā roto i teie ‘ati. I te taime a ura ai, ‘ua fa’aoti a’e na te mau rave ‘ohipa a teie taiete.
