I te fenua nei, tai’ohia 40% o te mau vahine e haere nei i te taote nō te pata i te hoho’a o tō rātou tītī. 165 rātou te ro’o nei i te ma’i māriri ‘aitītī i te matahiti hō’ē. « E nehenehe te mau vahine, tei fa’aruru i teie ma’i teimaha, i te fa’a’ite i tōna hi’ora’a pāpū i te mau vahine ‘aita rātou i ‘ite i te huru mau o tōn rātou nei ma’i, e nehenehe e tauturu i teie nei mau māmā. Te vāhi faufa’a ato’a, e roa’a te tahō’ē, te hau, te ‘oa’oa ‘e te here i roto i teie nei tā’atira’a », Simone Tunutu, mero nō te tā’atira’a Amazones Pacific.
‘Ia ‘oi’oi te ma’i i te ‘itehia, ‘ōhie ato’a i te rāpa’aura’a i te tupu, nō te mau ma’i māriri ‘aita’ata ato’a. 800 ta’ata te ro’ohia nei i te ma’i māriri ‘aita’ata i te mau matahiti ato’a, te māriri ‘aitītī i ni’a i te mau vahine ‘e te ma’i māriri ‘aipunatāne nō te mau tāne. Te fifi, te ‘ere nei te fenua i te mau taote rāpa’au, ‘inaha ‘aita rātou e ‘ana’anatae rahi ra i te ohipa io tātou nei. « Tītauhia e fa’a’ōhie te terera’a ‘ohipa a teie mau taote, te parau ānei nō te tārena te mau fārereira’a io te taote, te mau taime rāpa’aura’a ānei. ‘Eiaha nā rātou e ha’apa’o i teie tuha’a. Te vai ra te rāve’a roro uira ānei ‘aore ra te tihepura’a i te mau utuutu ma’i tauturu ‘e nā rātou ‘e ha’apa’o te fa’arevara’a ‘o te ma’i ānei. ‘Ia ha’apa’o te taote te rāpa’aura’a, oti atu ai », te reo ‘o Teanini Tematahotoa, te fa’atere nō te pū mā’imira’a māriri ‘aita’ata i Pōrīnetia Farāni nei.
Terā ra, ia au i te pū o te ma’i māriri ‘aita’ata nō Pōrīnetia Farāni, e riro ‘o Tahiti i te fāna’o i te tahi mau taote rāpa’au ma’i māriri ‘aita’ata i teie hope’a matahiti. Mau taote tei mana’o e ‘ohipa i Taratoni, i mua ra i te mau ‘arepurepura’a e tupu ra i tāua fenua ra, ‘ua fa’aoti e haere mai e rave i te ‘ohipa io tātou nei.