‘Ua tarenahia teie hoera’a ‘i ni’a i te āteara’a 18 kirometera, ‘e nā Charles Teinauri ‘aito nô te pupu a Shell Va’a ‘i arata’i ‘i teie hoera’a mai te ‘ōmuara’a, ‘āpe’ehia ‘i muri noa mai ‘e te tahi atu ‘aito hō’ē ā tā rāua pupu, ‘o Narai Atger .
‘Ia piri atu ‘i te taime hope’a nō teie hoera’a, ‘ua tu’u ‘o Charles Teinauri i te hope’a , ‘ua ma’iri mātāmua ‘oia i te reni tāpa’era’a 1h06 minuti ‘e 17 tetoni, ‘āpe’ehia ‘i muri noa mai ‘e Narai Atger ‘e ‘o Kevin Céran Jérusalémy
Te nā’ō nei ‘o Charles » hō’ē ā tomora’a vau i roto i te ava ‘e ‘o Narai Atger, ‘inaha ‘ua fa’aineine ‘āmui māua. ‘I te matarara’a ihoa māua i rāpae ‘i te ava nō Tahara’a, tō’u ha’amatara’a ‘e tūra’i ‘i tā’u topara’a hoe, ‘aita vau ‘i fa’aea ‘e ‘ua tāpe’a noa vau ‘i tāu avei’a. ‘E mea fa’ahiahia roa ia pa’iu’ma ‘oe ‘i ni’a ‘i te tiara’a mātāmua. Te vāhi fifi noa ra ho’i, te tāpe’ara’a ia ‘i teie tiara’a, ‘e ‘ere ‘i te mea ‘ōhie, tītauhia ‘e fa’anaho maita’i.
‘E fa’aineinera’a pāpū ato’a teie nō te mau ‘aito hoe nō te tata’ura’a Super ‘Aito tarēnahia i te 2 nō tetepa.