‘Aita te mau horopātete tarēnahia nō Ra’iātea ‘e Huahine i mana’o e’ita te manureva e tau i te vāhi i fa’aauhia e rātou, i teie tāpati ahiahi.
Nō te manureva mātāmua tāpurahia nō te rere ti’a i Ra’iātea, i Bora Bora roa i te ha’amaura’a : « ‘ua fa’a’ohu noa mātou i te fenua, ‘e nō te fa’ahōpe’ara’a ‘ua tonohia mātou i Bora Bora. ‘Ua fa’aea ri’i mātou i reira nō te tītōra’a i te mōrī hou mātou a fa’aho’i mai ai i Tahiti nei », i te reo o hō’ē horopātete.
Nō Alexandrine, te maere nei ‘ona i te ‘ohipa i tupu. « Ua ‘ite o Air Tahiti te reva e tupu ra io tātou. No te aha pa’i rātou e tāpe’a noa ai terā mau rerera’a ? Fa’arevara’a mātou, mea au maita’i te tere. Taera’a atu io tātou ‘e’ita e nehenehe e tau. I teie nei, fa’aho’ihia atu ra te manureva i Bora Bora. Māuruuru, ‘aita e fifi i tupu. Muri-iho-ra’a te parauhia mai nei e ho’i roa mai mātou i Tahiti. Teie nei, ‘aita hō’ē a’e fa’aarara’a e nahea ? ».
Nō Joanna, tei ni’a ‘ona i te piti o te manureva, terā i tarēnahia nō Huahine. « Mea roa e te fiu ato’a », i tōna reo.
Tei te area nō te hora 9 i te pō te taera’a mai te mau horopātete. « E tāmata ia e ani i te feti’i mai te mea e nehenehe rātou e ti’i mai ‘ia māua. ‘Aita ana’e, nā i’ō a’e noa ia te pārahi, e tā’oto ihoa ia mai tā te fa’ehau », i te mau ha’apāpūra’a a Alexandrine.
‘Ua fa’anahohia te revara’a o teie mau horopātete i teie nei mōnirē.
