Fa’aau hia nō te hōpe’a matahiti 2023 rā, pae (5) ‘āva’e i muri mai, ‘aita ā te pātia ārai nō te ma’i « Papillomavirus » ‘i fa’a’ohipa hia atu ra i te fenua nei. Te tumu: ‘ua tāere hia te mau pu’e parau ‘e au nō tōna fa’a’ohipara’a. ‘I teie mahana, ‘ua nu’u te ‘ohipa.
« ‘I te hepetoma ‘i mahemo a’e nei, ‘ua fa’atae mātou ‘i te parau fa’aau ‘i te tōmite teitei ‘a te mau fare rā’au. ‘E mai te peu, ‘e fa’ari’i hia teie parau fa’aau, ‘e tu’urima ia mātou ‘i te hō’ē parau fa’aau ‘e te mau fare rā’au tāta’itahi, nō te ha’apāpū ‘e nā te pū ICPF ‘e amo ‘i teie ha’amāu’ara’a, 100%, nō te mau tamāroa ‘e te mau tamāhine, mai te ‘ahuru mā hō’ē (11) tae atu ‘i te ‘ahuru mā maha (14) matahiti » te pāhonora’a ‘a te ra’atira nō te pū ICPF, Teanini Tematahotoa.
Maha ‘ahuru mā hō’ē (41) fare rā’au nō tahiti ‘e te mau motu tei ō ‘i roto i teie fa’anahora’a. Nō te mau motu, ‘aita ‘e fare rā’au, nā te mau pū rapa’aura’a ‘e ha’apa’o te reira. ‘Ōhie noa atu rā ia nō te huira’atira.
« Mea au roa nā’u ‘e ia pāruru hia tā tātou mau u’i ‘āpī, te mau tamahine ‘āpī. Nā mua a’e ta’oto ai ‘i te tāne…’e ‘e tūra’i vau. ‘Ua tāfifi vau terā ma’i, teie nei ua pa’ari vau, teie ‘aita vau ‘e hina’aro ia ro’o hia rātou » te reo teie ‘o te hō’ē metua vahine.
« Mai te peu, te vai rā te pātia ārai nō teie ma’i, ‘aua’e ia, mea faufa’a roa » te hi’ōra’a ‘o te hō’ē poti’i tamahine.
Piti tauatini (2000) pātia ārai tei fa’anaho hia. Toru ‘ahuru (30) mirioni te tāpura ha’amāu’ara’a amo hia ‘e te hau fenua. ‘E’ere rā ‘i te mea moni roa, ‘ia fa’aau hia ‘i te mau maita’i ‘e fa’atupu hia mai ‘e teie mau pātia. Ia iti mai te tirotiro « Papillomavirus », ‘e iti mai te ma’i māriri ‘aita’ata, iti ato’a mai ia te pau nō te ‘āfata turuuta’a nō te mau rapa’aura’a.
« ‘Ua fa’aohipa hia na te pātia ārai Papillomavirus ‘i te fenua ‘Auterāria. ‘E ua ‘ite hia te topara’a fa’ahiahia ‘o te nūmera ‘o te mau ma’i māriri ‘aita’ata nō te ‘auvaha vaira’a tamari’i, ‘e tetahi atu mau ma’i. ‘Ua ‘ite ato’a hia ‘e te ro’o hia nei te tamāroa te māriri ‘aita’ata nō te ‘arapo’a ‘e te mero ‘o te tāne. ‘E pātia ārai teie ‘e manuia nei, ‘e fa’aora ia ‘i te ta’ata » Teanini Tematahotoa.
‘E mai te peu ‘e ti’a hia, ‘i teie ‘āva’e nō tiunu teie pātia ‘e vata ai ‘i roto i te mau fare rā’au, ‘āva’e ato’a teie ‘i fa’ata’a hia nō te arai ‘i te ma’i māriri ‘i ni’a i te ‘auvaha tamari’i.
