Te tā’ato’araa ‘o te mau fa’a’amura’a pua’a tei hi’opo’a-hia. ‘O Amandine ‘e tāna pupu ‘ohipa tei tono-hia nō te ‘īriti te toto ‘o te mau pa’e ‘e te maia’a tei fa’ata’a-hia nō te fa’a’āerera’a ‘i te mau fanau’a. ‘I roto ‘i teie toto ‘e ‘ite-hia ai mai te peu ‘e ua ro’o-hia teie mau ‘ānimara ‘i te Brucellose…
« Ma’i teimaha roa te Brucellose ‘i te pae ‘o te ea ‘e te ‘īmira’a faufa’a, ‘inaha ‘e ma’i teie ‘e ha’afifi nei te maia’a nā roto i te fa’aiti pāpū ra’a ‘i te fanau’a ia fanau ana’e, te aura’a ‘e iti roa te ‘āpī ‘o te feiā fa’a’amu » te reo teie ‘o Amandine te taote ‘ānimara nō te ‘āmuitahira’a GDSA, pupu teie ‘e ‘āmui nei te mau tā’atira’a feiā fa’a’amu ‘ānimara.
‘Ia tupu ana’e hia te mau pua’a ‘i teie ma’i, e’ita te mau fanau’a ‘e mau, hau roa atu ‘e’ita te fanau’a ‘e noa’a fa’ahou ‘i te maia’a. Matahiti 2010 ra, 80% ‘o te mau fa’amura’a pua’a ‘i hi’opo’a-hia tei tupu hia ‘i teie ma’i i Pōrīnetia. ‘E mai te peu ‘e ‘ite ato’a-hia teie ma’i ‘i raromata’i ma, ‘e rave-hia ia te tahi fa’anahora’a ‘e au.
« Tītau-hia ‘i muri mai ‘e rave te ‘ohipa nā muri ‘i te pū fa’aterera’a ‘e te vai pārurura’a ‘i te ‘ihiora ‘e te fa’aterera’a nō te ‘ohipa fa’a’apu nō te ha’amau ‘i te hō’ē tāpura āraira’a ‘e ‘arora’a ‘i taua ma’i » Amandine.
E ‘i te reo noa ā ‘o te taote ‘ānimara, e’ita teie ma’i ‘e ha’afifi ‘i te taata.
« Mai te peu ‘e ‘āpe’e maita’i-hia te mau fa’a’uera’a ia tūpa’i ‘e ia tunu maita’i-hia te pua’a. ‘Aita ‘e fifi nō te ta’ata ».
Hi’opo’ara’a teie amo-hia ‘e te hau fenua, ‘e rāve’a ato’a ra nō te ha’apāpū te ti’ara’a ‘e te huru ‘o te ‘ohipa nō te fa’a’amura’a pua’a ‘i raromatai ma. Matahiti 2013 te hi’opo’ara’a hōpe’a ‘i te rave-ra’a-hia i raromata’i ma.
