I Tahiti nei, 290 ‘utuāfare tei tāpe’ahia ia au i te fa’aharuharura’a a te pū tai’ora’a ISPF nō hō’ē hi’opo’ara’a toto. I ni’a nā matahiti e 3 e orahia atu e tatou, e ‘īritihia te toto o te feiā pa’ari ‘e te mau tamari’i mai te 6 matahiti.
« E haere mai te utuutu ma’i nō te uiui i te ta’ata ‘e i muri iho pātia atu ai nō te ‘īriti i te toto. ‘Ia oti e hi’opo’ahia te toto mai te peu te vai ra teie rāve’a e pāruru nei i te tino i mua i te mau ma’i huru rau. Te piti o tā mātou tuha’a hiopoara’a, i te matahiti i mua nei, e tīti’ahia 300 ta’ata pa’ari nō te hiopo’a mai te peu e mea pūai tō rātou tino i mua i te mau ma’i tupuna », te mau ha’apāpūra’a a Maite Aubry, ‘āivāna’a mā’imi i te pū Louis Malardé.
Ia au i te mau pū’ohura’a e noa’a mai i mua i te ataata o te ma’i Dengue, Zika, Chikungunya, e tu’uhia te reira i roto i te rima o te pū o te ea nō te arai i te mau ma’i pe’e.
« ‘Ua ro’ohia na māua i te ma’i Zika, Chikungunya, te ma’i Tōvī ‘e te Dengue. ‘Ua mana’o māua e mea maita’i ‘ia ite teie mau ‘aivāna’a nō hea mai teie mau tirotiro. Pāpū, ‘aita māua i ‘ino roa, ‘ārea ra vetahi mau ta’ata, ‘ua fifi ia rātou i te pae tino, e mea tītauhia ia nu’u te mā’imira’a i roto i terā tuha’a», i te reo ‘o Raymond.
I muri mai te mau ‘īritira’a toto, e ha’aputuhia te mau fa’ari’i i roto i te fa’ato’eto’era’a a te pū Louis Malardé, ‘e ‘ia tupu ana’e te tahi mau hi’opoara’a, e tātarahia mai te reira nō te tuatāpapa i te pūai i rotopū i te mau tirotiro i mua ato’a i te ‘ū’anara’a o te ma’i pe’e.
« Nā roto i teie tītorotorora’a, e ‘ite mātou ia au i te matahiti o te ta’ata ‘o vai te mea pūai i mua i te ma’i. Nō te dengue, ‘ua ‘itehia mea iti roa te tamari’i e ro’ohia i teie ma’i, mea rahi a’e te feiā pa’ari. Nō reira, e mea faufa’a ‘ia araihia teie nūna’a ta’ata ‘ia tupu noa atu te ma’i pe’e », i te reo ‘o Van-Mai Cao-Lormeau, te ra’atira nō te piha mā’imira’a i te mau tirotiro i te pū Malardé.
Tītauhia e 3 matahiti nō te tuatāpapa 900 ta’ata nō te fenua nei. Rāve’a nō te hi’o ‘e te fāito i te mau tao’a pāruru ‘e nō te fa’a’ite ato’a te pū’ai o te tino nō roto mai hō’ē nūna’a ta’ata nō rāpae tā’atihia i te ta’ata tumu nō te fenua nei.
