‘I roto i te mau tōro’a ‘e mauhia ra ‘e teie mau taure’a tahiti, fa’ahepohia te ‘eta’eta ‘e te aupuru maita’ira’a i te mau manihini. ‘Ua fa’aru’e teie mau taure’a i te fenua ‘e ‘ua reva ‘i Paris nō te rave i te ‘ohipa. Nā roto i te onoono, ‘ua tapae ‘i ni’a i te ti’ara’a maita’i. Ei hi’ora’a, Bruno Teikiteetini, mai tōna tamari’ira’a tōna fāriura’a ‘i ni’a i te mau tōro’a hotēra.
« I tō’u na’ina’ira’a, tei pīha’i iho noa vau i tō’u metua tāne ‘ia haere ‘ona ‘e tunu i te mā’a nā te paroita anei ‘e ‘aore rā nō te mau ‘ōro’a. Nā te reira i tūra’i ia’u i te pe’e ato’a ‘i terā ‘e’a. Maōti i tā’u parau tū’ite CAP, ‘ua nehenehe ia’u i te ha’api’i nā tuha’a ‘e piti ‘o te ‘ohipa : te tūatira’a ‘e te tunura’a i te mā’a ». Nā Bruno Teikiteetini ‘e ha’apa’o ra i te tuha’a nō te mau ‘aitauira’a ‘e te mau hōani ‘i roto i te pupu Accor.
‘E ‘ere te mau tōro’a hotēra i te mea ‘ōhie. Tītauhia ‘e toro i te tari’a ‘i ni’a i te mau hia’ai ‘a te mau hōani, te ‘ā’au haeha’a ato’a ‘e ti’a ai nō te ti’ara’a ‘e amohia nei ‘e Otime Tauira. ‘O ‘ona te ra’atira nō te mau tāpura ‘ohipa ‘e au nō te fa’atīani ‘i te taiete « Polynesia Consulting ».
« Mai te mea ‘aita ‘oe i ‘ite ‘i te hi’opo’a i te mau mātete, te ‘ohipa nūmera ‘e ‘aore ra te arata’ira’a hō’ē pupu ‘ohipa, ‘e nehenehe te reira i te ha’afifi ‘ia ‘oe », i te reo ‘o Otime.
I rotopū i te mau taure’a tahiti tei fārereihia atu ‘e Moetai Brotherson, te vai rā ‘o Vaimanu Rey. ‘Ua ‘itehia tōna ‘aravihi ‘e te hotēra « Cheval Blanc » ‘i Paris. « ‘Ua nōminohia vau ‘ei ti’a nō te hotēra i te roara’a ‘o te matahiti. Tāpa’o fa’a’ite terā, ‘e nehenehe ato’a hō’ē tamari’i tahiti ‘e tapae i terā fāito ».
Nō te motu nō Pōpora ‘o Karl Teriipaia, parau tū’ite BAC Pro nō te mau patura’a. ‘O ‘ona te mono ra’atira ‘o te mau ‘ohipa rau ‘i te hotēra « Mandarin Oriental » ‘i Paris, tau matahiti i teie nei.
« Te pi’i nei au i te mau tamari’i tahiti ‘eiaha ‘e fa’ataiā i te reva ‘i te ara nō te ha’api’i ‘e ‘apo i te mau ‘ite ato’a. Mea rahi te ta’ata ‘aravihi ‘i te fenua. Te mau ta’ata ato’a tā’u i matau ‘e tei te ara i te ‘ohipara’a, tei ni’a rātou i te mau ti’ara’a teitei ».
Mai te mea tei ni’a rātou i te mau ti’ara’a maita’i, te mana’o ra teie mau taure’a i te ho’i mai ‘i te fenua nei, mai tā rātou i ha’apāpū ‘ia Moetai Brotherson.
«’E hi’ora’a maita’i teie mau taure’a. Te ‘ite mai ra tātou ‘e mau tamari’i teie nō Taha’a, Pōpora ‘e Tahiti, tei ha’api’i i te tōro’a, ‘e ‘ua hina’aro ‘e fa’ananea, ‘e fa’ahohonu atu a i tō rātou ‘aravihi ‘e ‘ua haere mai rātou ‘i Paris nei, tā tātou ia ‘e ‘ite ra i teie mahana. Tei roto rātou ‘i te mau hotēra tei tui te ro’o nā te ao », i te reo ‘o te peretiteni nō Porinetia farāni.
