‘E’ere i te ‘ume’ume nei i roto i teie ha’utira’a. I roto i te mau minuti matāmua, teie mai nei ‘o Heimanu Taiarui 1-0, i muri iho mai, Tamatoa Tetauira 2-0. ‘Aita ra i roa’a i te mau Tiki Toa i te tāpe’a i tō rātou ātea ‘e te tahi atu pupu, ‘oi’oi tō te fenua nei i te tāpapahia atu e tō ‘Ītāria, 2 tapa’o nā te ta’ata ra ‘o Marco Giordani : 2-2.
Mai reira mai, ‘aita te pupu ‘ītāria i tu’u fa’ahou. I te hope’a o te ha’utira’a : 5-2. ‘Ua ‘itehia te ‘aravihi ‘o teie nei mau mā’ona i mua i tō Tahiti nei, noa atu tō rātou fāito maita’i.
« ‘Ua ha’amata maita’i mātou i roto i te tuha’a matāmua. ‘Aita ato’a i ta’a roa i te ‘ohipa i tupu i muri mai », i te reo ‘o Raimana Li Fung Kuee, te tāpena o te mau Tiki Toa.
Pū’oihia mai e Heimanu Taiarui,« ‘ua ho’i mai rātou nō tō mātou hape. Mea nā reira tō rātou pūaira’a mai. Ha’apoupou ato’a vau i tā rātou tīa’i tāpa’o. ‘Aita mātou i ha’uti mai tā mātou i mātau (…) E hi’o mātou i mua, te vai ato’a ra terā ha’utira’a i te fenua Seychelles, ananahi tā mātou mau fa’aineinera’a e ha’amata ai, ‘eiaha e fa’atāere ».
A ta’a noa atu i te pupu ‘Ītāria, ‘ua papu atu ra e o ato’a te pupu Peretīria, Biélorussie ‘e ‘Īrania i roto i te tuha’a ‘āfa hōpe’a. E fa’aru’e te mau Tiki Toa ‘ia Dubai i teie nei mahana pae.