‘Aita e mahana toe fa’ahou nō te ‘īritira’a i te ‘ūputa o teie nei fa’a’ite’itera’a hotu rau i ni’a i te māhora nō ‘Outumaoro. Fa’aineinehia e te piha rautea ‘e nō te rava’ai, o « te ‘itera’a i te mau rave’a fa’ahiahia o te mau rā’au tanu » te tumu parau tei tāpe’ahia mai nō teie nei matahiti.
« E ha’afaufa’a i te mau tiare nō te mea, nō te mea e tao’a faufa’a teie i roto i te mau ‘utuāfare, ‘ei tauturu, ‘ei fa’anehenehe ato’a. Hau atu ā, te vai ra te tahi mau tiare e ‘amuhia. E ravehia tō rātou rau’ere nei ‘ei rau ota mai te miri anei, te hautei ‘e ‘aore ra te ‘āturi. I roto i te ‘āturi te omega 3. Terā te faufa’a o te tiare », i te reo o Thomas Moutame tei uiuihia e Juliano Tautu i roto i te ve’a.
Nō teie ta’urua ‘ua rau te mau fa’a’ana’anataera’a tei fa’anahohia mai. I roto noa a i te tuha’a o te mau rā’au tanu, e ‘āmui ato’a mai te feiā tūpa’i rā’au, nā roto ia e fa’a’ite mai te faufa’a e roa’a mai nā roto i terā e terā rā’au. « Nō te mea i terā ra tau, tā tātou fare rā’au tei roto i te nātura. I teie nei mahana, e fa’aho’i mai tātou i te reira. Nā hea tātou i te fa’a’ohipa fa’ahou i te mau hotu nō te fenua nei », o te mau mana’o ‘o te peretiteni nō te piha rautea.
I ni’a i te fa’ati’amāra’a te fenua nei i te pae nō te mā’a, nō Thomas Moutame, ‘aita ‘ona e ‘ite ra i te fifi. Nō na nei, « e tāpea tātou », terā ra, ‘ia ‘āmuihia te tā’ato’ara’a i tō rātou pūai mai te piha fa’a’apu anei, te DAG, te hau fenua, te hau Farāni, te mau ‘ōire ‘e te mau tā’atira’a. E tano ra i te fa’aineine nā roto i te tāvirira’a i te mā’a ‘e’ita e pau i te ho’ohia.
Ei hi’ora’a, i roto i te mau fare ha’api’ira’a, 50 tauatini merēti mā’a e fa’aineinehia nei i te mahana hō’ē. Nō reira, ‘ua ha’amau-haere-hia te tahi mau mātini nā te mau ta’amotu nō te tāviri i te mā’a ia tae i te tau ‘auhunera’a.
I te roara’a o te fa’a’ite’itera’a rautea, ‘ua rau te mau fa’a’ana’anataera’a tei fa’aineinehia, mai te mau tamari’i haere ha’api’ira’a e tae atu i te mau ta’ata pa’ari. E hope teie nei ta’urua a tāpati 6 nō ‘ātopa.
