I te matahiti i ma’iri a’e nei, nō te ua rahi, ¾ o te mau o te mau litchi mea fa’aru’e. I teie haerera’a, ‘ua pu’e noa i ni’a i te mau tumu. I roto i te fa’a’apu a Sylvin Viriamu, 26 tumu tei tanuhia e ana, a 12 matahiti i teie nei.
« ‘Aita mäua e tämiti na. Pape noa, e terā mau ‘āma’a tei pē i roto, e fa’ifa’i ia. E ‘atu’atu ihoa pa’i ‘oe mai tā ‘oe e ‘atu’atu ra i tā ‘oe vahine ‘aore rā tā ‘oe mau tamari’i, ‘ia ‘ite ato’a mai te tumu e te here atu ra ‘oe ia na », i te reo o te ta’ata fa’a’apu nei.
Mea ho’ohia mai e Sylvin e tōna hoa fa’aipoipo te vāhi e fa’a’apuhia ra e rāua. E vāhi rahi e te pāpū ato’a. Nō te litchi, mea fa’aāteatea te tanura’a o te mau tumu, ‘eiaha ia apiapi ‘ia tupu te mau ‘āma’a. Tōna tanora’a mau, i roto i te fa’a.
« Titauhia ma’a fenua päpü, ma’a fenua haumi. ‘E’ita e tanu i roto I te fenua mämü, ‘e’ita pa’i e rava’i te pape », i te mau ha’apāpura’a a Charly Audouin, te ra’atira nō te piha ‘ohipa fa’a’apu i Tubuai.
‘Aita ä te mau litchi i para atu ra. Teie ra, ‘ua ha’amata a’e nä te ta’ata i te fa’aau. I Tubuai iho e ho’o ‘o Sylvin 1000 faräne te kiro. Ia tapae I Tahiti, tō ni’a atu ā ia te moni, haere re 7000 farāne te ‘āfata 5 kiro. E ora maita’i te ‘utuäfare i teie ‘ohipa i te paraura’a a Sylvin Viriamu. « Tä ‘oe moni i roto hö’ë matahiti, te moni ato’a ia roa’a I roto noa hö’ë ‘äva’e ‘ö’otira’a ».
I te hi’ora’a a te fa’aterehau nō te fa’a’apu, e hau i te 140 tane litchi i teie nei matahiti, i Tubuai noa. E ho’ohia tāua mā’a nei nā te mau motu ato’a, e penei a’e, fēruri ato’a tōna huru fa’a’ohipara’a.
« Peneia’e e tano ato’a i te mau taiete tāviri tou i te fa’a’ohipa i teie mā’a hotu i roto i tā rātou inu, tano nō te mātete nō te fenua nei e nō te ara ato’a », i te reo ‘o Taivini Teai.
Nō te utara’a i te mau litchi mai Tubuai i Tahiti nei, mea nā ni’a ia i te manureva. ‘Ua fa’a’au o Air Tahiti 6 tae atu i te 10 rerera’a nō te hāpono mai i teie mau ‘āfata mā’a.