Ateatea te ra’i nō te taiete Air Tahiti Nui. I muri mai i te tau tōvī, rahi te mau horopatete tei utahia e ana. I te matahiti 2022, 77% te faito ‘ī o tana mau manureva, ‘ua ha’apāpū oia i tōna ti’ara’a mātāmua i te fenua nei. ‘Ia ‘āmuihia, 387 515 horopatete tei haere i ni’a i teie manureva, 86 390 ‘o rātou nō te reva roa mai ‘i Tahiti nei.
« Rave rahi mai taiete e mata’u nei ‘ia mātou. I teie nei taime o te mātete farāni ‘e marite teie e reva rahi nei », te mau ha’apāpūra’a a Michel Monvoisin, te peretiteni nō te taiete.
Nō atu ā te raura’a o te mau taiete ‘e te marara’a o te mau rerera’a i te hepetoma tāta’i tahi, tei mua ‘o ATN. ‘Ia hi’ohia i te mau nūmera nō te matahiti 2022, 40% o te mau horopatete tei mā’iti ‘iana nō te tere ti’a mai ‘i Pōrīnetia Farāni nei.
Te tūha’a e ha’apōiri nei i te ra’i ‘o ATN, o te mōrī ia, mea taimaha te mau ha’amāu’ara’a. Nō te matahiti 2022, 2.8 miriā te pau a te taiete.
« ‘Ia fa’aauhia i te matahiti 2019, tei ni’a ia i te fāito 7 miriā, matahiti 2022, 10 miriā. 2 miriā nō te morī noa ia, e te reira mā te ‘ore e ha’amara’a i te moni o te tīteti« , i te reo ‘o Michel Monvoisin.
Mai te matahiti i mā’iri a’e nei, taui noa te tarīfa o te mori, teie ato’a ia e ha’afifi nei i te taiete. ‘Ātīrā ra, ‘ua ha’apauutu oia i tōna ti’ara’a i ni’a i te mātete marite to’erau, ‘ua ‘iriti i te rerera’a Papeete/Seattle, te ‘ōpua ato’a ra e ho’i fa’ahou i te fenua Tāpōnē. ‘Ia hi’ohia, i te matahiti 2019, 60% ana’e rātou tei reva nā te ara.
« I te tau o te ma’i tōvī, ‘ua tāpe’a maita’i mātou i tā mātou fā. ‘Aita mātou i tu’u, te ti’aturi noa nei mātou e rēni pāpū te fenua Tāpōnē, nō te mau ‘ōpuara’a a te hau fenua, nō te ha’amaita’i atu ā te fa’ari’ira’a rātere. E ti’a e ha’apa’o maita’i te rēni e tere nei i te fenua Taina, te rahira’a mea nā te fenua Tāpōnē atu ia« , te ha’apāpūra’a a te ra’atira o te taiete, Mathieu Bechonnet.
E 4 manureva e fatuhia ra e te taiete e oia ana’e tei ni’a i te mau mātete ato’a. Ia au i te mau tohura’a e rahi atu ā te mau rātere o te haere mai ‘i te fenua nei.
