I ni’a hō’ē tāpū fenua 8000 m2, i Maharepa, i te ‘oire nō Paopao teie nei ‘ōpuara’a a te taiete Wane e vai ai. Mai te mea, ‘ua hōro’ahia te parau fa’ati’ara’a nō te patura’a i te fare toa a 3 hepetoma ‘i teie nei, te pe’ape’a nei ia te ‘āpo’ora’a ‘oire nō te pae o te ‘ōperera’a pape.
« ‘Ua hiti mahuta mātou i teie parau ‘āpī. ‘Ua ravehia te mau tītorotorora’a, ‘ua ti’a ato’a mai te mau ta’ata nō te pāto’i i teie ‘ōpuara’a. Parau mau, e nehenehe rātou e patu, ‘e’ita ra tā rātou e fa’a’ohipa ‘iana », i te reo ‘o Elsa Keck,te mono tāvana mātāmua nō Mo’orea-Mai’ao.
‘Aita te pupu Wane e mana’o ra e ‘ōfati i te fa’aotira’a a te pū fa’atāta’ura’a mātete, te APC, ‘aita atu e rāve’a e hi’o fa’ahou i teie nei ‘ōpuara’a. « I roto i tāna fa’aotira’a mātāmua, ‘ua ani mai te APC i te mau ha’apāpūra’a, o tā mātou nei ia e ‘imi nei i te rāve’a nō te pāhono atu, ia hōro’a mai teie pū i te parau fa’ati’a » i te reo ‘o Nancy Wane, te ra’atira o te taiete. « E nehenehe ato’a mātou i te ho’o atu hō’ē tuha’a o te fare toa i te hō’ē ‘ona ‘ē atu. I muri mai, fa’atae fa’ahou atu ai te parau anira’a i te APC ».
I te tahi a’e pae, te pe’ape’a nei te mau fatu fare toa na’ina’i nō Mo’orea i teie huru ‘ōpuara’a. Ei hi’ora’a, hō’ē fatu toa 300 m2 teie e fēruri nei, inaha ‘ua noa’a tāna parau fa’ati’a nō te fa’arahi i tāna fare toa i ni’a i te fāito 790 m2. I mua ra i teie ‘ōpuara’a ‘āpī o te riro i te fā mai, piri atu io na, te uiui ra te mana’o.
« E nāhea mātou i tā mātou ‘ōpuara’a ? ‘Aita mātou e hina’aro i te fare toa erā a’e i te rahira’a i Mo’orea nei, ‘aita mātou e hina’aro e haere ‘e ‘aro ia Carrefour, ‘aita tā mātou e rāve’a mai tāna », te mana’o o hō’ē fatu toa tei pāhono huna mai.
« E MAU ‘ŌPUARA’A RAHI ROA NŌ TŌ MĀTOU MOTU ITI »
Hō’ē fatu toa nō Moorea
« E mau ‘ōpuara’a rahi roa nō tō mātou motu iti », i te hi’ora’a a Aurélie Lecouvreur, fatu toa i Maharepa, « e taui ato’a te hōho’a o te fenua. ‘E ‘ere terā tā te mau rātere e hina’aro e māta’ita’i. Eaha te faufa’a i te mau fare toa mai terā e ‘itehia ra i Tahiti e ‘aore rā i te ara, mea māna’ona’o roa nō te mau fare toa na’ina’i ».
Te vai ra te tahi atu mau faito fare toa ‘e’ita e ha’ape’ape’ahia. « E’ita mātou e ‘atihia, ‘ua natihia mātou i te tāpa’o U, mea māmā tāna mau tārifa. Ia hi’o vau, o te mau fare toa nō Maharepa te fa’aruru maita’i », te mana’o o Pahi Motumoana, fatu toa i Afareaitu.
E riro ra, e ha’amata te patura’a o te fare toa Carrefour i teie matahiti.
