I teie tau, ‘e’ere i te ‘ohipa ha’uti ‘i te ‘imira’a te mau mātēria tumu no tā tātou nei rima’ī. Varavara te pae’ore, te pārau, ‘aore ra te rā’au no te nana’o, te tumu : rahi te ta’ata ‘e fa’a’ohipa ra teie mau moiha’a ‘e no te ahu o te paraneta varavara te mau vāhi tei reira teie mau faufa’a rima’ī i te tupura’a. I mana’o ai te pū ‘ohipa no te rima’ī ‘e fa’atupu teie mātete no te mātēria tumu no te rima’ī. Te fā, ia ‘ite fa’ahou te ta’ata pa’ari ‘e te mau tamari’i, te mau mātēria fa’a’ohipahia no tā tātou nei rima’ī, nāhea ia pāruru ia ratou ‘e ha’apūai te mau rāve’a ho’ora’a ‘e poro’ira’a o te mau tauiha’a ‘e ha’afaufa’a te mau mātēria tumu tei ‘ore roa te fa’a’ohipara’a mai te revareva anei. Hau roa atu, ia ‘ite te ta’ata te mau tōro’a ‘ohipa ‘e vai ra i muri mai ‘e te mau ‘ite ‘e tano ‘e fa’a’ohipa mā te ha’api’i te faufa’a ia pāruru te natura.
Nō teie fa’anahora’a, ‘ua pāhono ato’a mai te ‘āma’a ha’api’ira’a ‘ihi tauiha’a nihi no te fare ha’api’ira’a teitei no tamuera ra’apoto. 10 pīahi no te piha « design » tei hāmani mai i te hō’ē ‘āfata vaira’a mātēria ‘e putu nei te mau tao’a tumu no tā tātou rima’ī.
16 feiā rima’ī, te ho’o atu tā ratou mau pae’ore, te pūpū, te poepoe, te tapa. ‘Āre’a te mau tauiha’a i ‘ore i roa’a mai ‘e tupu ia tetahi fa’a’ite’itera’a hoho’a, mai te ‘ā’eho, te ‘ōfa’i no ua pou ‘aore ra te ivi ‘ānimara. Te mau fare toa tauiha’a rima’ī te ho’o ato’a tā rātou mau tao’a. ‘Ōpanihia te mau pute ‘urina, ia fa’a’ohipahia ra te mau ‘ete pae’ore.
E ha’amāramarama te pū ‘ohipa no te arutaimareva, tō te fa’a’apu ‘e te piha ‘ohipa no te rāva’ai i te ta’ata na roto te rāve’a o te vauvaura’a mana’o te mau mātēria pāruruhia ‘e te tumu i ‘ore roa ai vetahi ‘o ratou. E tae ato’a mai te mau tā’atira’a no te fa’ata’a te mau uru rā’au ‘e vai nei i pōrinetia, ‘aore ra te tumu ‘e pāruruhia ai te mau ma’o ‘e te faufa’a ‘e ia tīti’a maita’i tā tatou mau pehu.
I te roara’a ‘ōna mahana ‘e toru, fa’ari’ihia te manihini i roto i te ravera’a o te pa’eore, te ‘ā’eho, te kumu hei, te ‘ō’ini, ‘e mea ‘aufau. Tīa’i ato’a hia te mau tamari’i haere ha’api’ira’a i roto i tetahi mau ha’uti. Nō teie fārereira’a, ua hāmani mai te mau piahī no te ‘āma’a ha’api’i ‘ihi tauiha’a nihi nō te fare ha’api’ira’a teitei no tamuera ra’apoto, ‘i te hō’ē ‘āfata vaira’a mātēria tumu no te rima’i topahia te i’oa « Tamaumau ». ‘I tōna pae, ua mana’o mai te pū ‘ohipa ‘a te rima’ī i tāna ha’uti pi’ihia « Tere o te rima’ī ».
E matara teie mātete mātāmua no te rima’ī i te fare manaha i teie mahana maha i te hora 8.30 ‘ōpani atu ai i te mahana ma’a 26 no ‘ēperera i te hora 4 i te ahiahi.