Tāipuhia te īna’a i te hiti roa o te muriāvai, e ‘aita i māoro, ‘ua pu’e te īna’a i roto i te tāipu. ‘Aita te ‘ohipa i oti, e huri i roto i te tāvae, ta’ita’ihia atu ai i te vāhi ruru, i reira e vai ai te pāpare. « Tīti’ara’a īna’a pa’i, tīti’a i te pehu, te ‘ōfa’i pauroa. Te tahi taime, e ō mai te ‘iri’iri i roto. ‘Ia mā, i reira mātou e ‘āfa’i atu ai e ho’o », te reo teie ‘o Jean Tinorua, ta’ata tumu nō Maha’ena, te ora ra i te ‘ohipa tautai.
I te mau matahiti ato’a, ‘ia topa te īna’a, tiurai e hope atu i te ‘āva’e tītema, ti’a mai ‘o Jean ‘e tāna huā’ai tamari’i mai Maha’ena moti atu ai ‘i Fa’aone, mai i’ō nei i te muriāvai nō Va’iha. ‘Imira’a tumu teie nāna e hau atu i te fa’ahiahia, te tihepu ato’a nei ‘oia i te rave ‘ohipa. « Terā mau taure’are’a, ‘aita e ‘ohipa, ‘ua ‘ohi mai mātou, huri roto te pere’o’o haere tāipu te īna’a… mea itoito ihoa. ‘Aita e taure’are’a mea fa’aea noa. Pauroa te mau taure’are’a mea fetu ihoa ».
Te tahi ra ho’i fifi ‘e’ere nō teie matahiti nei, rave rahi mau vāhi e ‘ōpanihia nā te tomora’a muriāvai, fifi roa ai te ‘ohipa a te feiā tāipu īna’a.« ‘A vaiho pa’i te feiā tāipu īna’a ‘ia haere tāipu tā rātou īna’a, ‘eiaha e ‘ōpanipani noa te tahora. Pauroa teie mau taure’are’a, tera tā rātou ‘ohipa, ‘ohipa tāipu īna’a. Topa ana’e te īna’a, ‘ua haere pauroa rātou, mea rahi feiā tāipu īna’a. Terā ra, teie nei, terā mau ‘ohipa ‘ōpanipani pa’i, ‘aita atu ra ‘oe e nehenehe e haere i tera e terā vāhi. »
I te hiti purūmu e ho’oho’ohia ai teie īna’a. E piti fa’anahora’a nō te mau tārifa, 100 tārā hō’ē pū’ohu, ‘e ‘aore ra tauatini farāne te pū’ohu ‘e 3 ‘āu’a.
