I te taime ho’ora’a tīteti tei tute e fa’a’ohipahia ai. Mai te mau rātere, e au rā, ‘e aufau ato’a te feiā tumu e ho’i mai ra nā te mau fenua ‘e’ē.
‘E’ere ‘o Pōrīnetia Farāni ana’e teie e rave ra i teie huru fa’anahora’a. ‘Ua na reira ato’a ‘o Aotearoa, Bali, te fenua Tāpōnē, Bouthan ‘e te tahi atu mau ‘oire mai ia Venise. I te mahana mātāmua nō ‘ātopa, ‘ua mara’a te tute tomora’a i Niu Terani i te faito 8 330 farāne nā ni’a i te tīteti tāta’i tahi. I te fenua nei tē fa’a’ohipahia ra teie tute nō te mau rāve’a pārurura’a i te arutaimāreva ‘e ‘aore rā nō te mau ito mā.
Mai te 3 000 farāne e tae atu i te 10 000 farāne te mara’a
Teie tute, ‘e’ere nō roto mai i te fa’aterera’a a Moetai Brotherson. I rotopū i te mau tohura’a « Fāri’ira’a Manihini 2027 », teie ‘ohipa i te tārenara’ahia ‘e ‘ua ha’amanahia tei ‘ōpuara’a i te matahiti 2022 e te fa’aterera’a Fritch.
Ei hi’ora’a, mai te mea e tāpe’ahia 6 500 farāne (te tute) nūmerahia i ni’a 376 740 horopātete tei tae mai i Pōrinētia Farāni nei i te matahiti 2023, 2,4 ia miriā i ō mai i roto i te ‘āfata a te hau fenua, nō tāua matahiti ra.
A tīa’i noa atu ai e ‘ia ha’amanahia teie ‘ōpuara’a, tītauhia i te mau mero ‘āpo’ora’a rahi i te tuatapapā i te reira. ‘Ua ineine ‘o Warren Dexter, te fa’aterehau nō te terera’a faufa’a, i te ‘īriti i te mau tau’ara’a parau e te mau taiete nā rātou e ti’a’au ra i te ho’ora’a tīteti.
