‘Ua ha’apāpū te peretiteni Emmanuel Macron i te ‘āva’e tiunu ra, e fa’anu’uhia te mā’itira’a i te fenua Taratoni i te matahiti 2025. Hau atu, e hi’o-fa’ahou-hia te ture mā’iti, ‘ia nehenehe te feiā i fānauhia i te fenua Taratoni tae atu i te feiā e ora ra i’ō 10 matahiti a’e. Te tumu ia o te mau ‘ārepurepura’a i te fenua Taratoni mai te 13 nō mē mai ia.
I roto i te ‘ōrerora’a a te fa’aterehau nui mātāmua tei nōmino-‘āpī-hia, ‘ua ha’apāpū ‘o Michel Barnier, ‘e’ita te ture mā’itira’a e tauihia. Nō te mā’itira’a, e tupu ihoa i te matahiti 2025. Teie ia e pe’ape’ahia e te ‘īriti ture nō te pupu Loyalistes, Nicolas Metzdorf. Nō na, te ‘ohipa rū roa a’e, o te ferurira’a ia i te ananahi o te fenua Taratoni tei topa roa i roto i te hepohepo i teie nei mahana.
« ‘Aita hō’ē a’e mā’a i roto i te ‘ōrerora’a a te fa’aterehau nui mātāmua. ‘Aita ‘ona i fa’ahiti noa a’e te mau rāve’a nō te tauturu te fenua Taratoni. Tei roto roa te fenua taratoni i te ‘āpo’o, ‘ua fifi roa tāna terera’a faufa’a, te fa’ahotura’a, te orara’a tōtiare, te ti’ara’a mana o tō mātou fenua. ‘Ua ‘ere mātou 20 tai’o i te pae nō tā mātou fāito faufa’a roto, hau i te 10 tauatini ta’ata ‘aita e ‘ohipa fa’ahou. 700 taiete tei vāvahihia e riro ā te tahi i te ‘ōpani. Te fa’aru’e ra te nūna’a Taratoni i tō rātou fenua. ‘Aita hō’ē a’e fa’aārara’a nō te mau tauturu. Te hiti fa’ahou ra te mana’o e tāu’aparau, e mea faufa’a ‘ore. Nō te tītaura’a i roto i te rurura’a i Versailles, ‘e’ere nō na terā mana nō te peretiteni Hau Rēpūpirīta ra ».
Nō te pupu e tītau ra i te ti’amāra’a, tē māuruuru ra i te pi’ira’a a te fa’aterehau nui mātāmua, ‘ia ho’i mai te hau. Terā ra, ia niuhia teie mau parau i ni’a i te tahi ārata’ira’a pāpū, i ni’a ihoa ra i te mau tāu’aparaura’a.
« Mātou nei, tei ni’a mātou i te mau fa’aāura’a nō Nouméa, oia ho’i te ti’amāra’a. Nō teie taime, tē hina’aro ra mātou ‘ia pūharahia teie tārena ‘ohipa, i muri iho, ‘ia tātara-maita’i-hia e ‘ia māramarama tō mātou nūna’a. I ni’a ihoa ra i te parau nō te fa’arāva’ira’a faufa’a ‘e te fa’anahora’a hō’ē ‘āvei’a pāpū », te reo ‘o Emmanuel Tjibaou, tēpūtē nō te pupu e tītau ra i te ti’amāra’a ‘o Taratoni, « Mouvement indépendantiste des progressistes Calédoniens ».
‘A tīa’i noa atu ai ‘ia ho’i mai te hau, ‘aita e fa’ahuehura’a mai teie te huru i orahia 40 matahiti i teie nei. 13 ta’ata tei pohe, i rotopū ia rātou e 2 mūto’i farāni. Te vāhi pe’ape’a, ‘ua fifi roa te parau nō te fa’ahotura’a ‘e te terera’a faufa’a i Taratoni. Ia au te pū tōtiare, 20 tauatini ta’ata e fifi ra i teie mahana, ‘aita e mā’a, tītauhia e tauturu. « ‘Aita ‘e moni fa’ahou, ‘aita te pū CCAS e ‘ōpere fa’ahou ra i te tīteti mā’a mai tei mātauhia. ‘Ua ‘ere ato’a te tauturu nō te nohora’a ‘e nō te rapa’aura’a ma’i. Tē haere nei tātou i hea, e fifi rahi mau teie », te reo hepohepo ‘o Betty Levanqué, te peretiteni nō te pū tōtiare nō Taratoni.
Nō teie mau fifi e fa’aruruhia ra i te fenua Taratoni, ‘aita tā te mau pū tōtiare e rāve’a fa’ahou. Rahi te ta’ata tei ‘ere i tā rātou ‘ohipa, rahi te mau taiete tei tāninahia i te auahi. ‘Ino roa atu, tei roto te mau ‘utuāfare i te hepohepo, ‘ua mara’a ato’a te moni ho’o o te orara’a. « Ti’aturi vau ‘e’ita teie fifi e ‘ū’ana roa atu i te mau taime i muri nei, ‘aita vau e hina’aro ‘ia tupu te taparahira’a ta’ata nō te mā’a, ‘e’ere terā te fā », te māna’ona’ora’a rahi teie ‘o Francis Maluia, peretiteni nō te tā’atira’a RS 125.
