I ni’a i te tahua Facebook tō Moetai Brotherson fa’aararara’a mai i teie parau ‘āpī. I teie nei po’ipo’i mahana maha, tō te Peretiteni pūharara’a i teie nei parau ‘oa’oa nō te mau taure’a tei manuia i te tata’ura’a Capes ‘e o tei tonohia i te fenua Farāni nō tā rātou matahiti fa’aineinera’a. ‘Ua topa te hau, e fa’aea mai rātou i te fenua nei.
I ni’a 67 taure’a tei manuia i te tata’ura’a Capes, 8 rātou tei fa’ahepohia e reva i te fenua Farāni. Fa’anahora’a tei ha’ape’ape’a i te fa’aterehau nō te ha’api’ira’a. « Te vai ra te mau pārahira’a nō rātou i’o nei, ‘aita ra te pū rahi DGRH ‘i Farāni e hina’aro ia fa’aea mai rātou, teie tā’u e maere nei », i te reo ‘o Ronny Teriipaia tei uiuiha i teie mahana piti iho nei. « E ‘imi tātou i te rāve’a. ‘Ua fa’aarahia tō te hau nui ‘e te tīa’ihia ra tā rātou pāhonora’a. Te vai ra te pārahira’a i’o nei, ‘e’ita vau e fa’ari’i ‘ia reva tā tātou mau tamari’i ‘i te fenua Farāni ».
« E tāta’ura’a teie nā te hau nui. Nā te pū rahi ‘i Paris, e tuha i te mau pārahira’a i te vāhi e ‘ere ra te mau ‘ōrometua », i te ha’apāpūra’a a Thierry Terret, te ra’atira o te pū fa’aterera’a nō te ha’api’ira’a a te hau nui. « Te ‘itehia ra e i roto i te tahi mau tuha’a ha’api’ira’a te ‘ere ra te mau ‘orometua, te tumu ia nā taure’a e 8 i tonohia ai i te fenua Farāni nō te matahiti fa’aineinera’a. E nehenehe rātou e ani e ho’i mai ‘ia hope te matahiti matāmua. ‘Ia ‘ore rātou e reva, e ‘ere rātou i tō rātou ti’ara’a ».
I teie nei po’ipo’i mahana maha, ‘ua ha’apāpū ‘o Moetai Brotherson e ‘ua ‘aitaui ‘rāua’ona ‘e te Peretiteni nō te Hau Rēpūpirīta i ni’a i te fifi o tāua mau taure’a ra, e ‘ua fa’atae hō’ē poro’i nā na : « Peretiteni Emmanuel Macron, ha’amāururura’a teie ‘ia ‘oe nō te ‘ohipa tā ‘oe i rave mai nō tā mātou mau tamari’i. I teie po’ipo’i, ‘ua ‘itehia te ‘oa’oa ‘e te mata ‘ata’ata i ni’a i teie mau pīahi. E riro rātou, araua’e, ei ‘orometua nō te mau tamari’i nō te fenua nei ».
