‘Ahuru mā maha (14) fare ha’api’ira’a tuarua ‘a te hau tei fa’anaho ia rātou nō te Heiva Taure’a 2024: tō Arue, Mahina, Papara, Taravao, Ta’aone, Teva i Uta, Henri HIRO, te fare ha’api’ira’a tuarua nō Maco TEVANE e tō pomare IV. ‘E ua pāhono ato’a mai tetahi pae o te mau fare ha’api’ira’a nō te mau motu, mai ia Hao, Taha’a, Tubuai, te pū ha’api’ira’a tōro’a G.O.D nō Maupiti e te fare ha’api’ira’a ‘a te mau tamari’i huma nō te « Fraternité Chrétienne ». I mua i te ua puai i topa mai i te mahana mā’a ra, ua fa’anu’u hia te ‘āru’i hope’a, ‘inapō nei. Te mau fare ha’api’ira’a nō Taravao e Ta’aone tei ho’i fa’ahou mai i To’ata nō tā rātou ha’uti, hou ‘a tupu ai te ‘operera’a rē.
E i teie matahiti, te fare ha’api’ira’a nō Hao tei haru mai i te ti’ara’a mātāmua. Ua fa’ahiahia te tōmite hi’opo’a i tāna fa’anahora’a nō te ha’afaufa’a i tāna tumu parau, tei iāna ato’a te rē nō te ‘orero mou hia mai e Taravaiatematamuia MARAKAI.
HAO
I te ti’ara’a piti ‘o teie tata’ura’a, haru hia mai ia e te fare ha’api’ira’a tuarua nō Maco TEVANE. Taravao ‘i te ti’ara’a toru.
MACO TEVANE
TARAVAO
Te fare ha’api’ira’a nō Taravao tei haru ato’a mai i teie matahiti, te rē o te ha’uti nehenehe roa a’e tae noa atu i te rē o te tamahine ‘ori roa a’e ti’a hia mai e Areiti VERO, are’a te rē ‘o te tamaroa ‘ori a’e ua haru hia mai ia e Toahere LAFLAQUIERE – CHEE AYEE nō te fare ha’api’ira’a nō Teva I Uta.
I mua i te ruperupe o te mau ‘ohipa i rave hia mai e te mau piahi. Tetahi mau rē ta’a’ē tei ‘ōpere ato’a hia. Te rē ta’a’ē mātāmua tei pupu hia e te tōmite hi’opo’a i te fare ha’api’ira’a tuarua nō Mahina, nō tāna mau tuatāpapara’a ‘e tāna fa’anahora’a mai i tāna ha’uti. ‘E te piti o te rē ta’a’ē, ua haere ia i te pū e fāri’i nei te mau tamari’i huma e vai ra i te Mission a’e ra, ua fa’ahiahia roa te tōmite i te mau poro’i i vaihohia e teie mau tamari’i.
E i teie ā matahiti, ua mara’a fa’ahou te fāito maita’i o te mau pupu rohipehe, te fare ha’api’ira’a nō Taha’a tei haru mai i te rē mātāmua.
Nō te hitu (7) o te matahiti, peretiteni hia mai teie tata’ura’a Heiva Taure’a e Hiriata BROTHERSON, turu hia mai e Heimoana METUA, Poerava TAEA, Vaihere POHUE-CADOUSTEAU, Moana’ura TEHEI’URA, Guillaume FANET e o Tonyo TOOMARU.
Si vous n’avez pas pu assister au Heiva Taure’a, toutes les soirées sont encore disponibles en replay sur la page Facebook de l’événement, ici.