Nō Hiva Oa o Warren e ‘ua pa’ari i roto i te ‘ohipa tarai i ni’a i rā’au. ‘Ua nana’o i tāna mau pātia rouru matāmua i te ‘ahururaa o tōna matahiti. E ‘ua tāpe’a i teie ravera’a vaihohia e tōna mau tupuna, tae mai teie mahana.
« ‘I’u te hō’ē ‘āma’a ra’āu mā te faa’ōhipa hō’ē ‘apī parau, mea fiu ato’a. Terā ra, mea na reira tō’u metua tāne i te ha’api’ira’a ia’u i teie ‘ohipa, nā roto i te onoono e te fa’a’oroma’i », tāna e ha’amana’o ra.
Te tāmau noa ra ‘o Warren i te fa’arava’i i tōna ‘ite i te rimā’i, nā roto i te nana’ora’a i ni’a i te ivi, te pārau, te tari’atai e te rā’au. E mea au nāna e fa’a’ohipa te ahi e te ‘aito.
« Ua ha’amata vau i te fa’a’ohipa te ‘aito i muri mai tō’u mau tere i te fare manaha nō Tahiti, i Vaihī e i Aotearoa. Te rahira’a o te mau tao’a hāmanihia e te mau tupuna, hāmanihia ia i roto i te ‘aito. I tō’u ho’iraa i Mātuita, tō’u ha’amataraa i te hi’ohi’o i te mau tumu ‘aito », mai tei ha’apāpūhia e Warren.
Ua ti’a atu teie rahu’a 24 ana matahiti i roto e rave rahi mau fa’aite’itera’a a tō Mātuita, e tōna ‘utuāfare e te ta’atira’a Matakite. I teie mau mahana i muri, o ‘oia ana’e te fa’a’ite’ite i tāna mau tāo’a hāmani e pae ‘āhuru ti’ahapa rahira’a, i te fa’a’ite’itera’a ā te mau rahu’a ‘āpī fa’atupuhia i te hō’ē hotēra nō Fa’a’a. Fārereira’a faufa’a nō te ha’apāpū i tōna ti’ara’a i rotopū i te mau rahu’a no ‘ānanahi.
» O ‘oe ana’e i roto teie fa’a’ite’iteraa. Rave’a no te ‘ite e ‘ua mau anei te mau ha’api’ira’a e ‘ua ‘aravehi ihoā ‘oe », mai tāna i ha’apāpū mai.
Te tahi ā mau ‘ōpuaraa te fa’aineinehia ra e teie tamari’i nō Hiva Oa i teie matahiti. E ho’i ‘ōia i tōna fenua i teie ‘āva’e i muri nō te hāmani te tahi atu ā mau tao’a tāna e faa’ite i te faa’ite’iteraa tao’a a tō Mātuita te ‘iriti i te ‘āva’e nō Tiunu. E e ti’a ato’a atu ‘oia i te Matava’a nō Nuku Hiva.
