‘E hoe ra’a va’a hō’ē teie ‘e ravehia rā ‘e Steeve TEIHOTAATA. Hoera’a nō te nati ia Tahiti ‘i te fenua nō Popora, ‘ia ha’amana’o hia te parau ‘o tōna taea’e, ‘e hō’ē ato’a ‘o te mau ‘aito hoe va’a ‘āpī roa a’e ‘a te pupu hoe va’a nō Pira’e ia Kevin KOUIDER, tei fa’aru’e roa mai. ‘Ua fifi tōna māfatu ‘i te taime ‘a hoe ai ‘oia i te tuha’a mātāmua ‘o te hoera’a va’a Hawaiki nui va’a, ‘i te matahiti 2023 ra. Tei pāpū, ‘e hoera’a teie tei ī ‘i te tāpa’o nō Steeve TEIHOTAATA. « Teie ‘ōpuara’a, ‘ua fa’anaho ‘ēna hia ihoa, te taime fa’aru’e mai te parahata ia mātou. ‘E terā ihoa te ‘ōpuara’a, ‘e fa’aho’i tōna va’a ‘i te fenua ‘āi’a. Te hina’aro noa rā ihoa ‘e fa’aho’i i te matahiti ma’iri a’e nei, ‘aita rā te mata’i ‘e te ‘are i tano maita’i mai…mea mania ri’i rā teie tere tō mātou. Terā, nā i ‘ō nei fano atu ‘i Huahine nā mua, fa’afa’a’ea tau hora, oti ana’e, ‘āfaro roa atu ai i Popora po’ipo’i a’e » Steeve TEIHOTAATA te taea’e ‘o Kevin KOUIDER.
‘Ua fa’aru’e mai te ‘aito nō Pirae va’a ‘inapō ra i te hora 10, hau ‘i te 20 hora hoera’a ‘e tīa’i mai ra iāna. Hō’ē taote, hō’ē tuati ma’i ‘e ‘e piti ta’ata hōturu, ‘e 6 a’e ta’ata te ‘āpe’e ra ia Steeve TEIHOTAATA i roto i teie hoera’a huru ta’a’ē. « Nā ‘ōnei haere ‘i Huahine, 80 tiromētera, oti ana’e, 80 tiromētera ‘e toe nā Huahine hoe atu ‘i Popora…Ti’aturi maita’i hoa ia, ‘e ‘āpe’e mai ta’ata a’e rā ‘ia mātou, tō mātou tere tae noa atu te ‘utuāfare i te fenua ‘āi’a te tīa’i noa mai rā. ‘Aita, nōna hoa teie ‘ōpuara’a. Pauroa te mau ‘ohipa ‘e rave nei ‘i ni’a i te miti, nōna hoa ia teie nei » te mana’o ‘o Steeve TEIHOTAATA.
‘E tupu te ‘ōro’a fa’aha’amana’ora’a ‘i te parau ‘o Kevin KOUIDER i teie mahana mā’a 27 nō ‘ēperēra, ‘i tōna iho ‘oire, nō Fa’anui.