Nā te hō’ē pehepehe hīmenehia e te mau tamari’i ‘i ‘īriti i teie ha’uti teata ora, « I Tai” pāpa’ihia e Henri Hiro i te matahiti 1976. Tē fa’ahiti nei i te fifi e tupu ra i rotopū e toru ta’ata : hō’ē te fa’ahōho’a nei i te feiā veve, te piti i te feiā ri’iri’i ‘e te toru i te feiā moni. Tei ni’a rātou i te pa’epa’e e pāinu ra i ni’a i te moana. Te uiui nei tō rātou mana’o « ‘o vai te ta’ata tā rātou e ‘amu »? Te fa’a’ite ra teie ha’uti teata ta’ata ora te ‘ohipa tāviri ta’ata ‘e te paruparu o te nūna’a i mua i te tahi pae.
‘Ua mana’o te mau ‘orometua ha’api’i e fa’a’ohipa i teie ha’uti nō te fa’aitoito i te tamari’i ‘ia parau i te reo. « I te fare ha’api’ira’a, i roto noa i tā’u piha ha’api’ira’a rātou e tāmata ai i te parauparau nā roto i te reo tahiti. Teie nei, ‘ua ‘ite mātou teie fa’anahora’a, rāve’a tano ia nō te fa’aro’o i te tahi atu mau ta’ata », te reo fa’ahiahia ‘o Jeanne Rere, ‘orometua ha’api’i reo i te fare ha’api’ira’a tuarua Tinomana Ebb.
I teie tau varavara te feiā ‘āpī nō Tahiti i te ‘āparau nā roto i tōna te reo, ia au i te tītorotorora’a a te fa’aterehau nui i te matahiti 2020, 29% noa o te nūna’a mā’ohi te parauparau ra hō’ē o tōna mau reo. Te ti’aturi nei teie ‘orometua e tūra’i i teie hā’uti teata ta’ata ora i tāna mau piahī i roto i te ‘ōrerora’a. « Aita…te nu’u ra. Fa’aitoito ihoa ia nō te tūra’i i teie reo tō tātou. Ia au i tō mātou ti’ara’a ‘orometua, e fa’aitoito ihoa, nō te mea, e manuia ihoa », Jeanne Rere, ‘orometua ha’api’i reo tahiti.
‘Ua tārenahia te tahi atu ha’utira’a « I tai » i te 12 nō ‘atopa i te Fare Tauhiti Nui, i te ta’urua « Parau ti’amā ».
