« Maūruuru i te fatu », te reo o te metua Bruno Mai i teie nei mahana piti. I te mahana toru, e utahia rātou nā ni’a i te pere’o’o mata’eina’a ‘i ‘Ioritānia, i reira e fa’aea rātou e 3 mahana, i muri mai e vāhihia e 2 pupu. « ‘Ua ‘imi terā ta’ata e ha’apa’o ra ia mātou i te rāve’a ‘ia roa’a te tahi manureva nō mātou. (…) E tā’āfahia te pupu, nō te rahi o te ta’ata. 12 ‘o mātou e ‘āpe’e i te mau paretenia, nā Turquie rātou i te ho’i iho i Paris. 22 ta’ata e nā muri iho ia’u nō te reva i Roma. E tā’oto mātou ‘i ‘ō hō’ē e ho’i roa atu ai i Paris. I Paris te tā’ato’ara’a o te pupu e fārerei ai. Pō tāpati mātou e tapae atu ai i te fenua ».
‘Ua topa te hau ‘o na ta’ata 34 i te fa’aarara’ahia atu teie nei parau ‘āpī. « Aita mātou i fa’aro’o rahi i te pa’a’ina o te mau ‘ōfa’i tūpita ‘e pupuhi i teie nei mahana ».
‘Ia au i te pū’ohura’a hōpe’a, e 8 ta’ata farāni tei pohe i roto i teie mau ‘arora’a, 20 teie e pā’imihia nei i te fenua ‘Īterā’era, « e’ita e ‘ore e ua ‘āfa’ihia rātou e te mau ‘orurehau », i te reo o Catherine Colonna, te fa’aterehau nui e tī’ā’au rā i te mau aura’a e tō te ara.
‘Ua ha’apāpū te fa’aterehau nui, « e tonohia hō’ē manureva a te taiete Air France a mahana maha, nō te haere e ti’i i te mau ta’ata farāni », rātou tei mau i te fenua ‘Īterā’era.
