« Mai te mea e anihia mai ia mātou, e ‘oa’oa roa mātou nō te fa’ari’i i te mau tata’ura’a hōrue nō te heiva nui JO », te pāhonora’a à Laurent Peyrondet, te tāvana nō te ‘oire Lacanau, i te APF. « ‘Ua tai’o mātou i roto i te mau ve’a i te mau fifi (…) nō te rave i te tahi mau fa’anahora’a i’ō. Mai reira, ‘ua vai ineine noa mātou ».
Matauhia te ‘oire Lacanau nō te fa’ari’ira’a i te mau tata’ura’a fa’atupuhia e te World Surf League (WSL) – te taiete e ti’a’au ra i te mau ‘aito nō te hōrue – nō reira ato’a ‘ona i ‘āmui ato’a ‘ona i tītau ‘ia fa’atupuhia teie mau tata’ura’a ‘io na, ‘o Teahupo’o ra tei tāpe’ahia e te tōmite ta’urua i te matahiti 2020 ra.
‘Ua na reira ato’a te mau ‘oire nō Biarritz (Pyrénées-Atlantiques), La Torche (Finistère) e Les Landes (Hossegor, Capbreton e Seignosse).
« Mai te mea e anihia mai, ‘e’ita mātou e pāto’i », i te reo o Stéphane Le Doaré, tāvana nō Pont-Labbé e Peretiteni ato’a nō te ‘āmuitahira’a o te mau ‘oire Pays Bigouden Sud, e ti’a’au ra i te tuha’a La Torche. « No teie nei taime, ‘aita e anira’a i tae mai, teie ra ua matau mātou i terā mau huru fa’anahora’a (…) ‘E’ere te mau ‘are i te mea teitei, tano ra nō te fa’ahe’e ».
« Mea ti’a roa ia itehia te fa’aotiraa hou te hōpe’a matahiti. Inaha, tītauhia te mau fa’aineinera’a », te poro’i a te tāvana Stéphane Le Doaré. Uiuihia e te pāpa’i ve’a AFP, ‘aita te tāvana nō Biarritz i hina’aro e hōro’a i tōna mana’o. I te hōpe’a matahiti 2019 ra, ‘ua amuamu nā te tuha’a Pyrénées-Atlantiques i te mā’itira’ahia o Tahiti.
I te mahana pae i ma’iri a’e nei, i te taime tāmatamatara’a, ‘ua iri te kau fa’ata’ahia nō te patura’a i te pa’epa’e a te tōmite hi’opo’a, i ni’a i te mau ‘ōfa’i. Te tumu ia te fa’aterera’a hau fenua i fa’ataime ai te mau patura’a.