Vahine matauhia i roto i te orara’a o te fāri’ira’a rātere i te fenua nei, ‘ua mā’itihia ‘o Annick Paofai nō te amo ato’a i te rama. I ni’a i tāna ‘api natirara, te fa’aha’amana’o mai ra ‘o Annick Paofai ‘o oia te vahine matāmua nō te fenua nei tei fa’ahe’e nā ni’a i te ‘iri hōrue i te area matahiti 65.
‘Ua fa’afeti’ahia na ‘o Annick Paofai i te feti’a hanahana ‘ura, nā roto i teie nei nōminora’a a te tōmite nō te heiva tū’aro nui 2024, mai ia Mehiata Riaria, purotu nō Tahiti 2013 ‘e te ‘aito hōrue ‘o Hira Teriinatoofa ‘e taure’a fa’aineine ato’a i te pupu mā’iti nō Farāni, e amo ato’a atu ‘ona i te rama.
« Mai Taiarapu atu, ‘e’ita vau e fa’aea i te turu i tō’u fenua », ia i te mau pāpa’ira’a a Annick Paofai i ni’a i tāna ‘api natirara. Nōna, teie nōminora’a, ei tāpa’o ha’amāuruurura’a nō te mau ‘ohipa ato’a i ha’ahia mai na e ana.
E tae mai te rama i te 13 nō tiunu ‘i Tahiti nei. E ha’amata te tere o teie nei rama mai Teahupoo ‘e tae atu i Papeete.
‘Ia tai’ohia, 11 000 ta’ata o te hōpoi tāta’itahi atu iana mai te ha’amatara’a o tōna tere e tae atu i te hōpe’a. I Tahiti nei, 24 ta’ata o te mā’itihia nō te reira.
