Te mau mā’ona ‘e tō rātou mau ‘utuāfare tei tāpapa atu i te tahua taura’a manureva i te pō mahana mā’a ra. Tāpupuhia te fa’arevara’a ‘o te mau mā’ona, vetahi tei fa’areva i te mahana pae ra, tere ti’a atu rātou i te ‘oire nō Los Angeles ha’apou mai ai i te fenua Vaihī. 230 feiā hoe va’a, tāne, vahine ‘e te mau taure’a, tei tāpurahia nō teie tata’ura’a ‘aito nō te ao. « Bora Bora, ‘e toru fāito pupu tāna ‘e ‘āfa’i ra, tā tātou mau piri’a tāne ‘e tae noa atu tā tātou mau teina tamāroa ‘e te mau teina tamahine, teie tā mātou ‘e ‘āfa’i ra i roto i teie hoera’a vitiviti ‘i te fenua Hilo », te reo teie ‘o Daniel Taea, nō te pupu Popora va’a.
‘I te pae o te ta’ata fa’aineine, i roto i te hepetoma hope’a hou te fa’arevara’a, i roto noa ā ‘o Philippe Bernardino i te ha’amaita’ira’a i te pupu mā’iti nō Tahiti. « Te feiā i mā’itihia mai, ‘e feiā ‘aito ihoa i roto te mau pupu ato’a, tae noa atu i te feiā ‘āpī, feiā pa’ari ‘e te mātuatua. Tāpe’ahia mai ihoa te feiā maita’i roa a’e. ‘E’ere i te mea ‘ōhie nō teie va’a matahina, pa’ariri’i, tāviri ana’e. ‘Eiaha pa’ari noa nō tātou, pa’ari nō pauroa te mau fenua. Tera ia e tātā’ihia ra, ‘e imi te rāve’a, ia ‘oi’oi teie va’a ». I te pae o te mau taure’a, Sheyenne Avaemai ‘e o Roane Atu tetahi ‘o te mau ‘aito taure’a nō te pupu mā’iti nō Tahiti tei roto ato’a i fa’atanotanora’a i tā rāua topara’a hoe. « Mea fifi roa nō’u ‘i teie taime tīti’ara’a nō te mea, mea rahi roa te mau tamāhine hoe va’a maita’i. Tā’u fā, te fa’aho’ira’a mai te feti’a nā Tahiti » i te reo teie ‘o Sheyenne. « E ua ineine maita’i mātou, te fā, te ti’ara’a mātāmua hoa ia. Mai te peu, ‘e nehenehe ‘e haere ‘e ti’i i te rē, ‘e haere ihoā ia » Roane Atu, hō’ē o te mau taure’a tane.
Roto ato’a teie pupu mā’iti te ‘ite-ato’a-hia ra ‘o Karyl Maoni, ‘aito nō te ao ‘e 8 taime, ‘e te ho’i fa’ahou ra i Vaihī, nō te tītau i te tahi ā fēti’a ‘auro. « Ua ineine maita’i, ‘ua ineine te fa’aineinera’a, pauroā te mahana i ni’a i te miti. Te vai ra hō’ē ta’ata nō Niuterani, teie te fa’a’ea ra ‘ō na i Hawaii, ‘e hoe ‘ona i roto i te pupu Maui Gensen tā’u ‘i matau terā mau matahiti haere ai vau i roto i te tuha’a Open. ‘Aita ra vau i ‘ite i tōna faito i teie matahiti. Teie nei iā’u ra, ‘ua fa’aineine maita’i vau » Karyl Maoni.
Nō teie tata’ura’a tō Farāni, Taratoni, tō Vaihī teie e tīa’ihia ra. I teie matahiti 500 mā’ona ‘e feiā māta’ita’i nō Niuterani te tāpapa ato’a atu i teie tata’ura’a rahi. « Te 16-17 nō ‘ātete, tā tātou ia mau pupu tīti’a…piri tātou tera 20 fenua. E hoe noa rātou i roto noa tera ‘e piti mahana. Haere mai atu ai, tā tātou va’a hō’ē, fa’ahope roa atu ai terā hepetoma…te mau teina, hoera’a ‘āpī ia, va’a hō’ē noa tā rātou i te pae nō te tīti’a, i te pae o te mau club, ‘ua ō mai tā tātou mau teina, mai ia Mataiea, tō Ra’iātea. ‘E toru pupu tamāroa ‘e tamāhine tei fāna’o i teie fa’arevara’a…Tera ia te fā, pauroā tā tatou pupu i haere, nō te haere ihoā ‘e ti’i tera rē » Rodolphe Apuari’i, peretiteni ‘āmuitahira’a feiā hoe va’a nō Tahiti, uiuihia i roto tā tatou ve’a tahiti i te mahana pae 9 nō ‘ātete ra.
Tāpura faufa’a nō teie tere o tā tātou feiā hoe va’a i Hilo, 200 mirioni amohia e te hau fenua. E ha’amata te pupu mā’iti nō Tahiti i tāna mau tata’ura’a i teie mahana pae 16 nō ‘ātete.
E ha’apuro’o ti’a tā tātou nei ‘āfata teata TNTV te tā’ato’ara’a o te mau tata’ura’a, ha’amata i te 15 nō ‘ātete nā roto i te ‘ōro’a ‘īritira’a tae atu i te 23 nō ‘ātete, mahana hōpe’a o te mau tata’ura’a. Fa’anahora’a rautihia, mai i’o nei atu, e te mau pāpa’i ve’a Naea ‘e ‘o Davidson Bennett tae noa atu ia Vaitiare Nauta, mai te hora 10 i te po’ipo’i tae atu i te hora 5 i te ahiahi.
