I te ‘oire no Nice tō Raanui Daunassans ‘itera’a mai te puta pāpa’i rima hia ‘e te tamahine hui ari’i Takau Pomare-Vedel. « E fare manaha mau teie, ha’apāpūhia ‘e Takau i te ‘ōmuara’a ‘o tāna puta pāpa’i. ‘I reira, ‘i Nice ‘e au tōna nohora’a mai te hō’ē tahiti iti ra te huru, ‘ua tāpe’a ‘oia i te tā’atora’a ‘o te faufa’a ‘o tōna metua vahine marau ta’aroa » mau parau matāmua ‘a Raanui Daunassans, te hina a te ari’i vahine Marau Ta’aroa ‘e mo’otua nā Takau Pomare-Vedel.
‘Ua ha’amata o Raanui Daunassians i te pāpa’i ‘i tāna puta i te matahiti 2021 ‘e ‘ua nēne’ihia ‘a tahi ‘āva’e teie nei. « ‘Ua fa’aro’o ‘oia te mau ‘āparaura’a ‘e ‘ua ‘ite ato’a ‘oia ‘i te mau ‘ohipa tei tupu, ‘aita te mau ta’ata pāpa’i ‘o terā ra tau ‘i ‘ite mata. Te aura’a, ‘ua tae ‘oia i te mau vāhi ‘āparaura’a hunahia ‘e ‘ore ‘e ‘itehia ‘i roto ‘i te mau puta ‘i pāpa’ihia ‘e teie tau » hau roa atu nā roto teie puta te heheu ato’a nei ‘oia ‘i te huru orara’a ‘o Marau Ta’aroa « ‘i teie mahana te po’ihā nei te feiā ‘āpī ‘i te ‘ite, ‘e te hina’aro ato’a ra ‘e ‘ite ‘i tō rātou ‘a’amu. Te vai ra tetahi mau puta, ‘aita ‘e mā’a ‘e rāva’i ra ‘i roto, penea’e ‘ua matau ato’a rātou i te hi’ora’a ‘a te pāpa’a. ‘E ‘i roto ‘i teie puta pāpa’ihia ‘e Marau, te fa’ati’a ra ‘oia ‘i tōna iho orara’a, tō mātou iho parau ‘e nā te ta’ata tai’o ‘e tātara atu i te mea ‘e au nō rātou ‘i roto ‘i teie puta » Raanui Daunassans.
Puta ato’a teie ‘e pūhara nei te orara’a ‘o te tau ari’i « ‘i roto ‘i teie puta ‘e ‘ite ‘outou te huru ‘o te ari’i vahine ra ‘o Marau ‘o teie fa’atura hōhonu i te feiā ‘aifenua ‘o tei ‘āfa’i mai ‘i tā rātou ta’ere ato’a. Terā ra, nō te fenua peretāne ato’a tōna pāpā, te aura’a ‘e ‘ite ato’a ‘oia te mau peu nō tō’o’ā ‘o te rā. Nō reira ‘e nehenehe ‘e parau, ‘ua ora ‘oia i roto ‘i te mau peu peretāne ‘e te mau peu mā’ohi ato’a, ‘aita ‘i mo’e iāna ‘e mā’ohi ‘oia » te reo fa’ahiahia o Raanui Daunassans i mua i tāna puta pāpa’i. ‘Aita atu ‘e poro’i nō roto mai te hina ‘a te ari’i vahine Marau Ta’aroa, maori ra, ‘ia ho’o te u’i ‘āpī ‘i tāna puta.
