60 mahana muri mai te piti ‘o te hatura’a ‘o te mā’itira’a ‘īriti tūre. ‘Ua fa’aoti ‘o Emmanuel Macron, ‘e ha’apārahi ia Michel Barnier i te ti’ara’a fa’aterehau nui mātāmua. Noa atu te mau fa’ahapara’a mai roto mai ‘i te pupu Rassemblement Nationale, te hi’o ‘ino nei te nōminora’a ‘o te hō’ē ti’a nō te pupu Républicain.
Hou tōna nōminora’a, ‘ua fārerei te peretiteni Macron ia Bernard Cazeneuve nō te pae ‘aui ‘e ‘o Xavier Bertrand no te pae ‘atau. Fa’ari’i ato’a te peretiteni Macron i tāna peretiteni nō te pū raumaire i Farāni, ia Thierry Beaudet. Tera ra ‘ua tāpe’a mai ‘oia ia Michel Barnier. Mātau hia teie ti’a poritita nō tōna arai: ‘i te mea, nāna ‘i fa’atupu te fa’aaura’a rotopu te hau peretāne ‘e te hau nō ‘europa i te tau o te Brexit. Hau atu te reira, ‘ua pārahi mai ‘oia i ni’a i te mau ti’ara’a fa’aterehau, mai te matahiti 1993, ‘i roto i te fa’aterera’a ‘a Jacques Chirac e Nicolas Sarkozy.
‘E hōpoi’a rahi te tīa’i mai ra teie ti’a tahito ‘a te pupu LR i te mā’itira’a peretiteni nō Farāni i te matahiti 2022. Te tumu, ‘aita ‘e pae rahi tō teie fa’aterera’a. ‘I tōna nōminora’a hia ihoa ‘i te mahana maha ra, ‘ua fa’a’ite ‘o Michel Barnier i tōna mana’o pūai “’e fa’aea ‘i te parauparau ‘e rave ra te ‘ohipa” “mā te fa’atura ‘i te tā’ato’ara’a ‘o te mau pupu poritita” noa atu te mau fa’ari’ari’ara’a nō roto mai ‘i tetahi mau mero ‘āpo’ora’a ‘īriti ture.
Te ha’api’ira’a te parau no te pārurura’a, te tomohe’era’a, te horo’ara’a te ‘ohipa ‘e te moni ho’o ‘o te orara’a, tāna mau ‘ōpuara’a, tā te pupu RN ‘e tīa’i ato’a ra tāna mau fa’anahora’a.
‘I mua i te fa’aterera’a hau nui, ha’apāpū ato’a o Michel Barnier, tāna mau fa’anahonahora’a i te mau ‘ōpuara’a ‘i fa’ataimehia muri mai te ha’apararira’a o te ‘āpo’ora’a ‘īriti ture, fa’aotihia ‘e te peretiteni Macron. Mau ‘ōpuara’a ha’amaita’ihia iau i tāna hi’ora’a. ‘E ‘e hi’opo’a rū ato’a ‘oia i te tāpura faufa’a ‘a te hau nui no te matahiti 2025.
“Tā mātou ‘ohipa, te tāmatara’a ‘i te pāhono i te mau ‘ōpuara’a, ‘i te ‘ino’ino ‘e te māuiui ‘o te ta’ata tae noa atu te ‘imira’a te rāve’a ‘i mua ‘i te mana’o e ‘ua fa’aru’ehia ratou ‘aore ra ‘aita ‘e ture” te reo teie o te tōmitera tahito nō ‘europa, Michel Barnier. ‘Oia ato’a tei fa’a’ite i roto i te ‘aitauira’a mana i tupu i Matignon, ‘i te faufa’a “‘ia hō’ē ‘e ‘ia tupu te hau”.