Ti’ara’a 3 nō te mau Tamahine ‘ura i roto i teie mau hā’utira’a hōpe’a nō te harura’a ‘āu’a tu’era’a pōpō OFC a te mau vahine. Ti’ara’a fa’ahiahia i te hi’ora’a a te tāpena o te pupu, Haranui Le Gayic : « ‘Oa’oa roa mātou nō te ‘ohipa i ravehia. Teie nei ti’ara’a 3 ia itehia ‘o Tahiti, ‘e’ere i te fa’ahiahia nei. E tāpe’a noa mai mātou i te mau ha’api’ira’a maita’i tā mātou i ‘apo mai i roto i teie mau ha’utira’a ». ‘Ua roa’a i te pupu mā’iti nō Tahiti i teie ti’ara’a inaha ‘ua upo’oti’a ‘ona i roto i te ha’utira’a e te pupu nō Tonga, 5-3.
« Aita mātou i mana’o e roa’a ia mātou terā ti’ara’a. ‘Ua tāpe’a i tera fāito nō te mea ‘ua vai hō’ē noa mātou », i te reo ‘o Xavier Samin, te ta’ata mā’iti. « Terā te ta’a’ēra’a ».
‘Ua tupu te ha’utira’a hōpe’a i rotopū i te pupu nō Fītī ‘e te pupu nō Aotearoa, ‘aita e nehenehe e parau, mea pūai nā pupu e piti. « Ia hi’ohia teie nei ha’utira’a, mea teitei te fāito », i te mana’o o te pāpa’i parau rahi ‘o te FIFA, Fatma Samoura. « Te ‘aravihi-noa-hia atu ra terā mau pupu na’ina’i i pau ‘ōhie noa na i mūta’a ra i te mau pupu nō te mau fenua mai Niu Tirani. Te fa’a’ite mai ra te huru ha’utira’a a te pupu nō Fītī, noa atu te iti e tāpae ihoa ‘e haere roa atu ai ‘e ‘aro i te mau pupu rahi ».
I roto i teie ha’utira’a, ‘o Aotearoa tei upo’oti’a mai. Nāna ia e ti’a atu nō ‘Ōteānia i te harura’a ‘āu’a FIFA nō te ao.