‘Ua tupu te fārereira’a i rotopū i te mau fa’atere nō te Fare Rata ‘e te mau aupupu CSTP-FO, CSIP, O Oe To Oe Rima, Otahi ‘e SAPOT, i teie mahana piti, i te pū rahi a te Fare Rata i Fare ‘Ute.
Te ‘imi nei te taiete i te mau rāve’a nō te fa’aiti i te pau, ‘ua piri i te ono miriā. Nō te mau aupupu ‘e’ere nā te mau rave ‘ohipa e amo i taua hopoi’a ra.
« I te Fare Rata, te fifi, o teie ‘ia mau tauiuira’a ta te fa’atere e te fa’aterehau e tī’ā’au ra i teie pū, e hina’aro ra e rave i roto i te parau fa’aaura’a i ni’a i te fāna’o a te mau rave ‘ohipa. ‘Aita te mau rave ‘ohipa e ani ra e ‘ia ha’amara’ahia tā rātou moni ‘āva’e. Te fa’ari’i ato’a ra rātou ‘ia hi’o-fa’ahou-hia te tahi mau fāna’o ‘eiaha ra te tā’ato’ara’a. Te hina’aro ra rātou e fa’aiti i te mau ha’amāu’ara’a i ni’a i te fāito 250 tae atu 300 mirioni i ni’a i te tua ‘o te mau rave ‘ohipa. Te pau a te taiete, ‘e’ere te ‘ohipa nā te feiā rave ohipa. Nā te mau fa’atere i rave i te mau fa’aotira’a moni roa nā te taiete », i te reo ‘o Cyril Legayic nō te aupupu CSIP.
« Tā mātou i te pārurura’a ia i te mau rave ‘ohipa o te mau taiete ato’a i natihia i te Fare Rata. E hope te mau fa’aaura’a i te 30 nō tetepa. Te anihia mai nei e hōro’a i tō mātou mana’o i ni’a i te mau tauira’a e ‘ōpuahia ra i roto noa i te area hō’ē hepetoma. Nō mātou mea poto roa. Te tumu ia mātou i ani ai ‘ia tūra’ihia taua tai’o mahana ra », te mana’o ‘o Edgar Sommer nō te aupupu CSPT-FO.
I muria a’e e piti hora fārereira’a, ‘ua mau te mau ‘aitauira’a. Te tumu, ‘ua tu’urima te aupupu A ti’a i mua hō’ē ‘ōpuara’a parau fa’aau taiete ‘e ‘o Onati e te Fare Rata i te mahana pae ‘i mā’iri a’e nei. Teie ia e māuruuruhia nei e te pāoti rahi ‘o te Fare Rata : « e nu’ura’a rahi terā » i te reo o Jean-François Martin.
Nō A ti’a i mua, ‘aita e mahana toe fa’ahou no te tu’urima i te mau parau fa’aau taiete. Te piri mai ra te tai’o mahana tā’ōti’ahia i ni’a i te faaitira’a i te mau fāna’o a te mau rave ‘ohipa. « ‘Ia fa’a’orehia te mau fa’anahora’a o te mau parau fa’aaura’a i taua mahana ra. ‘Ua tupu ra te mau tāu’ara’a parau ‘e te mau fa’atere tae roa i te tae roa i te mahana i tā’ōti’ahia, te 30 nō tetepa », te mau ha’apāpūra’a a Avaiki Teuiau, te pāpa’i parau rahi nō te aupupu A ti’a i mua.
E farerei ā na aupupu pāruru e 4 ‘e te fa’aterera’a o te pupu OPT ‘i te mahana toru i te hora 8 i te po’ipo’i.
