Iau i te mau tītorotorora’a mātāmua. Hō’ē vahine tei pāinu ‘i te ‘oire no Saint-Denis, hō’ē tane tei fa’aru’e roa mai ‘i roto ‘i te hō’ē ‘ati auahi i te ‘oire pū. E te toru o te ‘ati pohe ‘o te hō’ē fa’ahou ā vahine tei tāpo’i-hia te vari muri mai ‘i te he’era’a fenua i te tuha’a pi’i-hia Trois Bassins, i te pae to’o’ā ‘o te ra ‘o te fenua. E riro ato’a ra e, ‘e pae ta’ata tei pēpē ‘i roto i te terera’a ‘o teie mata’i rorofa’i.
I roto ‘i tāna vauvaura’a mana’o i teie mahana pae, ua fa’aāra te ti’a ‘a te hau nui Patrice Latron. E ua tāpe’a-hia te tāpa’o ‘ū ‘ute’ute i te fenua Réunion, ‘ōpani-hia te ta’ata ‘ia haere rapae i tō rātou mau nohora’a tae atu i te mahana ma’a hora ‘ahuru ‘i te po’ipo’i. E te pe’ape’a nei ‘oia i te mea, « mea pūai a’e teie mata’i rorofa’i ia fa’aau-hia ‘i te mata’i rorofa’i Belal » tei tā’iri teie fenua i te 15 no tenuare 2024, ‘e 4 ta’ata tei fa’aru’e mai i roto taua mata’i rorofa’i, 100 mirioni moni ‘euro te tāpura faufa’a o te mau māteria ‘i vāvahi-hia.
Iau te pū mitora’a reva, fāito-hia 214 km/h te pūai o te mata’i i te tahua taura’a manureva i te pae ‘apato’erau ‘o te fenua. Pūai te ua. ‘I ni’a i te nātirara, ua ‘ite-hia te hoho’a o te mau aroa Saint-Denis ‘e Saint-André tei tere-hia te pape. Tere te mau pereo’o. ‘E ua tomo ato’a te pape i roto i te mau fare. Rave rahi mau fa’a’apu tei ‘ino ato’a ‘i te rave ra’a ‘a te pape.
Ua ha’apāpū te fa’aterehau ‘a te nu’u, ‘o Sébastien Lecornu, ‘e ua ineine te hau nui no te tono ‘i te mau fa’ehau tupohe, te mau mūto’i farāni, te mau pereo’o ‘e te toe’a o te mau rāve’a rū.
Iau i te piha ‘ohipa ‘a te hau nui i te fenua Réunion, 847 ta’ata tei fa’ari’i rū-hia i roto i te mau pūhapa, 182 000 ta’ata tei mutu te uira, 171 000 ta’ata ‘e ‘aita ‘e pape fa’ahou i roto i te nohora’a ‘e 134 000 tei mutu te natirara.