I teie nei po’ipo’i mahana maha, tei Tavararo ā te mau fa’ehau tūpohe auahi nō Fa’a’a nō te tīnai te toe’a o te mau vāhi e ura noa ra ā. I ni’a e maha fare maeha’a, e 3 nā te taiete Agritech i reira te auahi i te ha’amatara’a. Hau atu i te mau rā’au ataata e ho’ohia ra e ana, i roto i te maha fatuhia ra e hō’ē taiete ‘ē, e mau moiha’a hotēra ia.
« Nō te mea iana, te vai ra te mau rā’au fa’anehenehe. Mea rahi te mau tāti’a rā’au e ura ra i muri. ‘Ua fa’aho’i fa’ahou mai mātou i te pereo’o a te ‘oire, ‘ia tātarahia te mau moiha’a e fa’aapiapi nei ‘ia nehenehe mātou i te haere e tūpohe i te uahi i muri mai », i te reo o te ra’atira nō te pārurura’a tīvira nō te ‘oire nō Fa’a’a, Daniel Vanaa.
I te area nō te hora 8 inapō nei, te ha’amatara’a te ‘ati auahi. Te fifi, te tomora’a i roto i te fare toa, ‘ua pōnaohia te mau ‘ōpani ‘āuri. A tīa’i noa atu ai ‘ia ‘āfa’ihia mai te tāviri, mea nā rāpae noa atu te mau fa’ehau tūpohe auahi i te pīpīra’a i te pape.
« Te vai ra te mau pōnao nā rāpae, te vai ra te mau pōnao nā roto. ‘Ia au i te pūai o te auahi, e’ita te ta’ata e tae nā roto mai. ‘Ua tāmata mātou i te tāpū, pauhia te taime, mea nā reira tō mātou fa’ahaerera’a mai i te pereo’o tāipu a te ‘oire, nāna i pana, i tātara i teie mau ‘ōpani ‘ia pīpīhia te pape i ni’a i te auahi », i te mau ha’apāpūra’a a Charles Vanaa.
Tē tītorotoro nei te mau mūto’i i ni’a i te tumu o teie nei ‘ati auahi. ‘Ei fa’aha’amana’ora’a, ‘ua pāheruhia teie nei fare toa Agritech i te ‘āva’e ‘ātopa ra, nō te mau rā’au ataata o tōna e tapiho’o nei mai te rā’au rautea ‘e ‘āore ra tīnai manumanu.
A tīa’i noa atu ai te mau pū’ohura’a mātāmua, i teie nei po’ipo’i, ‘ua tāmau ā te mau mūto’i i te tomo nā roto i te mau ‘utuāfare nō Tavararo, no te fa’atea i tō rātou nohora’a. E nehenehe te au auahi i te fa’ataupupū i tō rātou ea. Te vai ra tei fa’ari’i, vetahi ‘aita.
« I roto i teie mau au auahi, ‘e’ita e nehenehe e fa’a’oroma’i. Te vai ra te mau mea i roto, ‘aita e ha’apa’ora’a » i te reo ‘o Eddy Tuhiti, mūto’i ‘oire nō Fa’a’a.
I roto i te parau fa’a’ati tāna i pia i ni’a i te tahua natirara, te fa’atae nei te taiete Agritech « i te mana’o tātarahapa, i te mau ta’ata e noho ra nā pīha’i iho atu no te mau taupupūra’a tā teie ‘ati auahi i fa’atupu ».
