« Mea pinepine au i te reva, a tahi nei au a huru ‘ē ai », i te reo ‘o Lana, hō’ē o te mau horopātete. Piti hora i muri a’e i tōna fa’arevara’a mai Tahiti-Faa’a ‘i Los-Angeles, te fa’aho’i mai nei nō te « hau’a pa’apa’a i mā’i mai hō’ē vāhi vaira’a mā’a », ‘ia au i te pāpa’i parau rahi o te piha ‘ohipa a te tomītēra teitei, Xavier Marotel.
“‘Ua rave te ‘ihireva i te mau ‘ōhipa nō te pārurura’a. ‘Ua fa’aoti te tōmana e fa’aho’i mai (…) E’ere hō’ē fifi rahi tei tupu », i tāna mau ha’apāpūra’a.
“‘Ua fa’aara mai te tōmana te ‘ohipa i tupu (…) ‘ua pe’ape’a roa mātou, ‘ua vai hō’ē noa ra mātou i roto i te manureva. Te vai ra te mau horopātete tei fa’aoti i te pure », i te reo ‘o Lindsey, hō’ē o te mau horopātete.
I tāna paraura’a, e piti taime tō te tōmana fa’ataura’a i te manureva ‘aita ra i manuia, i te toru o taime, te tau mai nei i ni’a i te tahua taura’a. « ‘Ua pōpō mātou (…) Mea mata’i i tāua taime ra. Nā roto i te pure, ‘ua tae mai mātou. I teie nei, ‘ua topa te hau ».
‘Ua ha’apōpō ato’a te nā horopātete 279 i te huru ti’a’aura’a a te ‘ihireva tei tamarū i te tā’ato’ara’a. « ‘Ua parau noa mai rātou e ‘ua tupu hō’ē fifi, ia’u e hi’o mea au a’e ‘eiaha e paraparau rahi, a ri’ari’a te mau horopātete. ‘Ua rave maita’i te ‘ihireva i tāna ‘ohipa. Mai terā ihoa, e nehenehe te mau fifi e tupu. Te mea rā e tāpe’a mai, ‘ua ho’i maita’i mai mātou », i te fa’ati’ara’a a Lana.
‘Ia vai ineine i mua i te fifi, 20 pere’o’o fa’ehau tūpohe auahi nō Tahiti, 56 fa’ehau tūpohe auahi ‘e te mau ta’ata fa’aora, tei tonohia i te tahua taura’a manureva nō Faa’a.
I te hora 1:38 i te tahara’a mahana tō te manureva taura’a mai.
