22 minuti ma’iri i te hora 10 inapō te patēra’a te niuniu fa’aarara’a i te mau fa’ehau tūpohe auahi nō Pape’ete i te ‘ati auahi e tupu ra i Mama’o ‘aivi. 14 fa’ehau tei tono-rū-hia ‘eiaha teie ‘ati ‘ia ‘ū’ana roa atu.
« Nā roto i te aravihi o te mau fa’ehau, ‘ua mau te auahi, ‘e’ita e ‘ū’ana nā pīha’i iho mai. I raro, tera vāhi vaira’a taiha’a, terā ato’a tā mātou i pāruru », i te reo o te ra’atira’a fa’ehau tūpohe auahi nō Pape’ete, Sergio Bordes.
Ma’iri i te hora 11 ‘inapō, ‘ua pohe te auahi. E 4 ta’ata tei fa’ateahia ‘e ‘aita hō’ē a’e ta’ata i pēpē. Tei roto teie ‘ohipa i te rima o te mau mūto’i tītorotoro nō te ha’apāpū te tumu o teie nei ‘ati auahi.
‘Ua ha’apūrorohia hō’ē poro’i nā ni’a i te tahua natirara nō te tauturu i te mau ‘utuāfare ‘ati.
