Fānauhia teie nau maeha’a tamahine i Aotearoa i te matahiti 1997 ra. Ia au i te tahua natirara a te fare ha’api’ira’a teitei nō Auckland, ‘ua fa’aoti tō rāua nā metua e fa’a’ea i’ō nō te taime poto e ho’i mai ai i Tahiti. ‘Ua pa’ari ‘e ‘ua haere rāua i te ha’api’ira’a tuarua i te fenua nei hou ‘a reva atu ai nō te pū’oi i tā rāua tau ha’api’ira’a teitei i Aotearoa.
‘Ua roa’a ia Hukerenui tāna parau tū’ite tuatoru nō tāna mau mā’imira’a i ni’a i te rapa’aura’a pape vi’ivi’i, tāna fā, ‘ia fa’a’ohipahia te hōvai (hydrogène) nō te rapa’aura’a i te pape vi’ivi’i. Rāve’a nō te fa’atura te arutaimareva.
‘Āre’a nō ‘Ohinerau te tuhahine, ‘ua rave mai ia ‘ona i te ha’api’ira’a i ni’a i te ‘enetima pi’ihia “laccases”, ‘enetima teie e fa’ahuru’ē ra te mau māteriā tumu nō roto mai te aru. Ia au i te fare ha’api’ira’a teitei nō auckland, mau mā’imira’a faufa’a roa teie nō te hotuatau ‘e tā tātou fa’a’ohipara’a au noa i te mau mero oraora nō roto mai te natura.
« No teie nau maeha’a tamahine Bonnet, nō roto mai teie parau tū’ite tuatoru tā rāua ’i haru mai ‘i teie fa’anahora’a pi’ihia Tuākana tā te fare ha’api’ira’a teitei nō Auckland e fa’afāna’o nei i te mau pīahi. Pupu ha’api’ira’a teie nā te mau pīahi, te mau rave ‘ohipa ha’api’ira’a māori ‘e nō Pātitifā, tei tauturu pāpū ia rāua, ‘i manuia ai i tā rāua tau ha’api’ira’a » te pāpa’ira’a teie a te fare ha’api’ira’a nō Aotearoa.
Te ti’aturira’a, ‘ia tūra’i ato’a tō rāua parau ‘i te mau tamahine ‘āpī ‘ia rave i teie huru ha’api’ira’a : « Mea faufa’a ia rahi mai ā te mau vahine i roto i teie ‘āma’a ha’api’ira’a mā’imira’a, hau roa atu, ia rahi mai te mau vahine nō Pātitifā, ‘inaha varavara tō tātou mau pae fenua i roto i teie mau ha’api’ira’a. ‘Āma’a ha’api’ira’a teie, tā māua e mana’o ra, e ‘ana’anatae rahi te mau vahine nō Pātitifā » te reo teie o nā maeha’a tamahine.
E tōro’a ha’api’i tamari’i tō Hukerenui i te fare ha’api’ira’a teitei nō Auckland pū’oi noa ai ‘oia i tāna tau ha’api’ira’a.
‘Āre’a nō Ohinerau, te titau ra ia i te ‘ohipa e te mau taiete rahi e tūra’i ra te fa’a’ohipara’a i te mau rāve’a hotuatau nō te tā’ato’ara’a.
