Tīa’i-noa-hia na e ‘ua tupu, nā Oraihoomana Teururai e ti’a’au i te tuha’a nō te nohora’a, te fa’anahora’a fenua ‘e te ‘ohipa fenua. Ti’ara’a i amohia mai na e Moetai Brotherson tae mai i teie nei mahana.
« E toru tuha’a e ‘itehia ra i roto i te nohora’a. Te vai ra te tuha’a tōtiare ti’a’auhia e te pū OPH, e 600 hānere e patuhia i teie nei matahiti a ta’a noa atu i te mau nohora’a i roto i te mau fare tahua. Te toru o te tuha’a, teie mau nohora’a nō te mau ‘utuāfare e te vai ra tā rātou faufa’a moni ‘aita ra i rava’i, pi’ihia « logement intermédiaire » mai terā i ha’amata i Afa’ahiti », i te reo ‘o te peretiteni nō Porīnētia Farāni, Moetai Brotherson.
‘Ua ‘ite o Oraihoomana Teururai i te hōpoi’a e tia’i mai ra iāna, ‘aita te reira e ha’aparuparu ra iāna e tāna pupu ‘ohipa.
« Mai te mea e hi’ohia te mau nūmera a te piha nūmerara’a te vai ra te mau fare tārahu tau poto ‘e te mea vata ato’a. Te fifi e ‘itehia ra, ‘aita tāua mau nohora’a e fa’a’ohipahia mai hō’ē nohora’a tumu. Te fā e tītauhia ra, ‘ia riro te mau patura’a nohora’a ‘āpī ‘ei vāhi e fa’aea tāmau ai te ta’ata. Nō te moni o te māteria, ‘e’ita e roa’a ia tātou i te taui i te reira, inaha nō te ara mai te mau moiha’a. Nā te reira ato’a e ha’afifi ra i te mau patura’a », i te reo o te fa’aterehau ‘āpī, Oraihoomana Teururai.
‘Ua ‘itehia te ‘aravihi o teie nei taure’a 34 matahiti roto i te nohora’a, te tumu ia ‘ona i ha’amau-roa-hia ai.
« ‘Ua rau te rāve’a e vai ra i roto i te feiā ‘āpī. Te tahi taime, nā ‘oe e tāpapa nō te vitiviti o te ferurira’a », ‘ia fa’aro’ohia atu ‘o Moetai Brotherson.
I roto i te mau tauira’a i roto i te fa’atera’a hau fenua, nā Warren Dexter e amō ‘āpī i te Fare Rata, ti’a’auhia mai na e Vannina Crolas. ‘Ua hōro’ahia i roto i te rima ‘o Jordy Chan te parau nō te fa’ahotura’a ia Tahiti iti, nā roto i te tuhara’a mana fa’atere.
