I te po’ipo’i 16 nō tiurai 2024 te parau ‘āpī i te fa’arara’ahia mai, te vaiiho nei ‘o Gaston Flosse i tōna ti’ara’a peretiteni o te pupu poritita i ha’amauhia e ana. 93 matahiti tōna ‘e te hina’aro nei e fa’aineine i te ananahi : « te upo’o, ‘aita ‘e fifi, ra’ura’u noa ra te turi…te itoito noa ra vau. Tera rā, te hina’aro ra vau, hou vau e pi’ihia mai ai, ‘ia ineine pauroa te ‘ohipa. Tō’u orara’a ‘e tā’u vahine, ‘ua oti te fa’anahohia, te tahi atu ‘ua oti. Te toe nei te parau ‘o tā tātou pupu poritita », i te reo ‘o Gaston Flosse.
Gaston Flosse tei ha’apāpū ato’a i roto i tāna vauvaura’a māna’o « ‘aita vau i tūra’ihia ‘e te ta’ata, nā’u iho i fa’aoti ». Mai te mea ‘ua hiti noa na teie parau, i teie nei haerera’a ‘ua tupu roa. ‘Ua ha’amauhia te pupu Tāhō’ēra’a Huira’atira i te matahiti 1977 hou a riro mai ai ‘Āmuitahira’a o te nūna’a mā’ohi i te 29 nō tēnuare matahti 2022 ra.
I te 9 nō tiurai 2024, ‘ua fa’atae ‘o Gaston Flosse fa’ataera’a i tāna rata i tōna mono peretiteni mātāmua, Bruno Sandras. Rata e fa’aite ra e te vaiiho nei i tōna ti’ara’a peretiteni. Tōna aura’a, mai teie atu, nā Bruno Sandras e amo i teie ti’ara’a e tae atu i te 28 nō tētepa, tai’o mahana tāpe’ahia nō te rurura’a mero hope ‘e nō te mā’iti i te peretiteni ‘āpī. « Nō te fa’atere mai teie pupu ‘e nō te fa’atere mai i muri ‘i tāna fa’aterera’a 70 matahiti teie nei. E hōpoi’a terā i te mea ‘eiaha e mo’ehia, e ‘ere i te tauira’a ta’ata noa. Te ta’ata ‘e haere mai i muri mai iāna, hōpoi’a teimaha tera tāna e fa’aineine ra i te amo » i te hi’ora’a a Bruno Sandras, te mono peretiteni mātāmua nō te pupu ‘āmuitahira’a ‘o te nūna’a mā’ohi. Nōna ato’a, te mea faufa’a roa a’e, ‘eiaha te ‘āmahamaha ‘ia tupu i muri mai i te mā’itira’a ‘o te peretiteni ‘āpī. « ‘Eiaha mātou ia ‘āmahamaha. ‘E mai te mea, ia oti te rurura’a ‘āmui, te vai ra te fe’i’ira’a i roto i te tahi ‘e te tahi, ‘aita ia vau ‘i manuia i roto i teie hōpoi’a i te fa’aineinera’a i te rurura’a ‘āmui. »
Matahiti 1965 tō Gaston Flosse mā’itira’ahia, ‘ei tāvana nō Pira’e, matahiti ato’a i ha’amata ai ‘ōna i roto i te orara’a poritita. Matahiti 1978, ‘ua pārahi ‘i Taraho’i ‘ei mero ‘apo’ora’a rahi, ‘ua amo ato’a mai i te ti’ara’a ‘īriti ture ‘e to’ofā. ‘O ‘ōna ana’e te ta’ata tahiti tei mau mai na te ti’ara’a fa’aterehau nui. Piri i te 20 matahiti tōna fa’atera’a mai i te fenua.
